ہماری توجہ ایران کو ایٹمی ہتھیاروں کے حصول سے روکنے پر مرکوز ہے : امریکی نائب صدر

امریکی نیوز نیٹ ورک "پی بی ایس" نے نائب صدر جے ڈی وینس کے حوالے سے بتایا ہے کہ اگر ایران کے عوام حکومت کا تختہ الٹنا چاہتے ہیں تو یہ ان کا اپنا معاملہ ہے۔ انہوں نے مزید کہا کہ "ہماری توجہ ایران کو ایٹمی ہتھیاروں کے حصول سے روکنے پر مرکوز ہے"۔

وینس نے اپنے بیان میں کہا کہ اگر ہم ایران کے ساتھ کسی معاہدے تک نہیں پہنچ پاتے تو امریکی صدر ڈونلڈ ٹرمپ کے پاس متبادل راستہ موجود ہے۔

اس سے قبل امریکی صدر ڈونلڈ ٹرمپ نے اپنے اس بیان کو دہرایا تھا کہ ایران جوہری معاہدہ کرنا چاہتا ہے، ساتھ ہی انہوں نے خبردار کیا کہ "یہ معاہدہ نہ کرنا حماقت ہوگی"۔

ٹرمپ نے منگل کے روز فوکس بزنس چینل پر نشر ہونے والے ایک انٹرویو میں کہا "جیسا کہ آپ جانتے ہیں، ہمارا ایک بہت بڑا بحری بیڑہ اس وقت ایران کی طرف بڑھ رہا ہے۔ ہم دیکھیں گے کہ کیا ہوتا ہے۔ میرا خیال ہے کہ وہ معاہدہ کرنا چاہتے ہیں، اور اگر انہوں نے ایسا نہ کیا تو وہ بیوقوف ہوں گے"۔

امریکی صدر نے مزید کہا "ہم نے پچھلی بار ان کی جوہری صلاحیتوں کو تباہ کر دیا تھا، اب ہم دیکھیں گے کہ کیا اس بار مزید تباہی کریں گے"۔ اس کے بعد انہوں نے دوبارہ کہا کہ ایران معاہدہ کرنا چاہتا ہے لیکن شرط یہ ہے کہ وہ ایک "اچھا معاہدہ" ہو۔

ٹرمپ نے اپنی بات جاری رکھتے ہوئے کہا "کوئی جوہری ہتھیار نہیں، کوئی میزائل نہیں، ایسا کچھ بھی نہیں ہوگا، وہ تمام چیزیں جو آپ چاہتے ہیں (وہ معاہدے میں شامل ہوں گی)"۔

امریکی صدر نے گذشتہ ہفتے یہ بھی بتایا تھا کہ سلطنت عمان میں دونوں ممالک کے وفود کے درمیان بالواسطہ بات چیت کے بعد امریکہ اور ایران کے درمیان "بہت اچھے مذاکرات" ہوئے ہیں۔