کئی ریاستوں نے جمعرات کو اس بات پر زور دیا ہے کہ ایران اور امریکہ کے درمیان حال ہی میں طے پانے والی جنگ بندی میں لبنان کو شامل کیا جائے۔
فرانس کے وزیرِ خارجہ ژاں نول باروٹ نے کہا ہے کہ جنگ بندی میں لبنان کو شامل کرنا ہو گا اور فرانس کی جانب سے گذشتہ روز "بڑے" اسرائیلی حملوں کی مذمت کی۔
باروٹ نے مزید اس توقع کا اظہار کیا کہ پاکستان میں جو امن مذاکرات شروع ہونے والے ہیں، ایران ان میں مختلف رعایتوں کا سلسلہ جاری رکھے گا۔
انہوں نے ریڈیو سٹیشن فرانس انٹر کو ایک انٹرویو میں کہا، "ایران جوہری ہتھیار اور انہیں حاصل کرنے کے ذرائع ترک کر دے، خطے کے ممالک کے لیے اپنے میزائلوں اور ڈرونز کا استعمال روکے اور حزب اللہ، حماس اور حوثیوں جیسے گروہوں کی حمایت کرنا چھوڑ دے جو خطے کو غیر مستحکم کرتے ہیں۔"
مزید برآں باروٹ نے ایران سے آبنائے ہرمز کو کھولنے کا مطالبہ کیا۔
برطانوی وزیرِ خارجہ یوویٹ کوپر نے کہا ہے کہ اسرائیل کی لبنان پر گولہ باری "شدید نقصان دہ" ہے اور اس سے جنگ بندی کے غیر مستحکم ہونے کا خطرہ ہے۔
انہوں نے ٹائمز ریڈیو کو بتایا، "ہم لبنان کو جنگ بندی میں شامل دیکھنا چاہتے ہیں۔ ہم اس کی توسیع لبنان تک چاہتے ہیں کیونکہ بصورتِ دیگر اس سے پورا خطہ غیر مستحکم ہو گا۔ جو کشیدگی ہم نے کل اسرائیل کی طرف سے دیکھی، وہ بہت نقصان دہ تھی اور ہم دشمنی کا خاتمہ دیکھنا چاہتے ہیں۔"
اسرائیل نے ملک پر نازک جنگ بندی کو نقصان پہنچانے والے حملے کیے جن کے بعد چین نے بھی کہا ہے کہ لبنان کی خودمختاری کی "خلاف ورزی نہیں ہونی چاہیے۔"
چینی وزارتِ خارجہ کی ترجمان ماؤ ننگ نے ایک باقاعدہ پریس کانفرنس میں کہا، "لبنان کی خودمختاری اور سلامتی کی خلاف ورزی نہیں ہونی چاہیے۔ شہریوں کی جان و مال کے تحفظ کو یقینی بنایا جائے۔" انہوں نے بیجنگ کی طرف سے تحمل اور "علاقائی صورتِ حال کو مزید کشیدہ کرنے سے گریز" پر زور دیا۔
علاوہ ازیں یورپی یونین کی اعلیٰ سفارت کار کایا کالس نے کہا کہ جنگ بندی معاہدے میں لبنان کو شامل اور ایرانی حمایت یافتہ لبنانی گروپ حزب اللہ کو غیر مسلح کیا جائے۔
کالس نے ایکس پر ایک پوسٹ میں کہا، "اسرائیلی اقدامات امریکہ-ایران جنگ بندی کے لیے شدید دباؤ کی وجہ بن رہے ہیں۔ ایران جنگ بندی کو لبنان تک توسیع دی جائے۔"
انہوں نے یہ بھی کہا، "گذشتہ رات اسرائیلی حملوں میں سیکڑوں افراد ہلاک ہوئے جس سے یہ یقین کرنا مشکل ہو جاتا ہے کہ ایسی شدید نوعیت کی کارروائیاں ملکی دفاع کے زمرے میں آتی ہیں۔"
بدھ کے روز امریکہ اور ایران نے عارضی جنگ بندی پر اتفاق کیا۔ اس کے باوجود اسرائیل نے لبنان پر حملے جاری رکھے ہوئے ہیں جس کو تہران نے شرائط کی خلاف ورزی قرار دے کر تنقید کی۔
