تہران کا جوہری ہتھیار حاصل کرنا خطے کے لیے تباہ کن ہے : نیٹو سکریٹری جنرل

نیٹو کے سکریٹری جنرل مارک روٹے نے ایران کے حوالے سے امریکی صدر ڈونلڈ ٹرمپ کی کارکردگی کو سراہا ہے۔

روٹے نے بدھ کے روز فوکس نیوز نیٹ ورک کے ساتھ ایک انٹرویو میں کہا کہ ٹرمپ نے ایران کے حوالے سے بالکل وہی کیا جو انہیں کرنا چاہیے تھا۔ انھوں نے اس بات پر زور دیا کہ حتمی معاہدے تک پہنچنے کے لیے ان کا موجودہ راستہ درست ہے۔

روٹے نے خبردار کیا کہ تہران کا جوہری ہتھیار حاصل کرنا خطے کے لیے تباہ کن ہو گا۔ انہوں نے سوال کیا کہ کیا آپ تصور کر سکتے ہیں کہ اگر ایران جوہری ہتھیار حاصل کر لے؟

مزید برآں انہوں نے کہا کہ میں اس معاملے میں امریکی صدر کی مکمل حمایت کرتا ہوں۔ انھوں نے ایران کے جوہری صلاحیتیں حاصل نہ کرنے کو یقینی بنانے کے لیے ٹرمپ کی کوششوں کی تعریف کی۔

روٹے نے تصدیق کی کہ نیٹو اتحاد نے ایران کے خلاف امریکی فوجی کارروائیوں کے لیے اپنے اڈے فراہم کیے، جو کہ 28 فروری کو شروع ہوئی تھیں۔

آبنائے ہرمز کے حوالے سے نیٹو ترجمان نے واضح کیا کہ یورپی ممالک نے بارودی سرنگیں ہٹانے میں مدد کے لیے آبنائے کے قریب فوجی دستے تعینات کرنا شروع کر دیے ہیں۔

امریکی صدر نے کئی بار نیٹو اور اس کے رکن ممالک پر تنقید کی تھی اور یہ خیال ظاہر کیا تھا کہ انہوں نے ایران کے خلاف جنگ میں امریکہ کا ساتھ نہیں دیا... اور آبنائے ہرمز کو کھولنے میں تعاون کے لیے آمادگی ظاہر نہیں کی۔

امریکی صدر نے بارہا ان پر یہ الزام بھی لگایا کہ انہوں نے ایرانی سرزمین پر حملے کرنے کے لیے امریکی طیاروں کو اپنے اڈے استعمال کرنے کی اجازت نہیں دی، جس سے ٹرمپ اور دفاعی اتحاد کے درمیان پہلے سے کشیدہ تعلقات میں مزید تناؤ پیدا ہوا۔ اس پر وہ اکثر یہ الزام لگاتے رہے ہیں کہ یہ اتحاد امریکہ کی نسبت اپنے رکن ممالک کو زیادہ فائدہ پہنچاتا ہے، حالانکہ امریکہ دفاعی بوجھ کا بڑا حصہ اٹھاتا ہے۔

بات یہاں تک پہنچ گئی تھی کہ ٹرمپ نے نیٹو کے یورپی رکن ممالک میں قائم کئی فوجی اڈوں سے امریکی فوجیوں کو واپس بلانے کی دھمکی بھی دے دی تھی۔