نیتن یاہو کا جنوبی لبنان کے قلب سے حزب اللہ کو پیغام

اسرائیلی وزیر اعظم بنیامین نیتن یاہو نے کہا ہے کہ جب تک حزب اللہ اپنی دھمکیاں جاری رکھے گی، اسرائیل جنوبی لبنان میں موجود رہے گا۔

آج منگل کے روز جنوبی لبنان سے بات کرتے ہوئے نیتن یاہو نے مزید کہا کہ ہمارا موقف واضح ہے، جب تک خطرہ ختم نہیں ہوتا ہم جنوبی لبنان سے نہیں نکلیں گے... اور جب تک حزب اللہ یہاں موجود ہے، مسلح ہے اور ہمیں دھمکا رہی ہے، ہم یہاں رہیں گے۔

انہوں نے اپنے فوجیوں سے خطاب کرتے ہوئے کہا کہ آپ کے کام کی بدولت لبنان اسرائیل کو تسلیم کرتا ہے اور اسرائیل لبنان کو تسلیم کرتا ہے ،،، اور ہم ایران اور حزب اللہ سے کہتے ہیں کہ اس جگہ سے نکل جاؤ، یہاں اب تمہارے لیے کوئی جگہ نہیں ہے۔ دو خود مختار ریاستیں امن سے رہنا چاہتی ہیں۔

نیتن یاہو نے اس بات پر زور دیا کہ ان کی ہدایات کسی بھی خطرے کا فوری جواب دینے کی ہیں۔ انہوں نے مزید کہا کہ حزب اللہ کو چلے جانا چاہیے اور جنوبی لبنان میں اس کے لیے کوئی جگہ نہیں ہے۔

نیتن یاہو نے جنوبی لبنان سے اپنی بات جاری رکھتے ہوئے کہا کہ ہم سکیورٹی کی حقیقت کو بحال کر رہے ہیں اور ہم نے ایران کے محور کو زوردار طمانچہ مارا ہے۔

اتوار کے روز اسرائیلی وزیر اعظم اور وزیر دفاع کی جانب سے جاری کردہ ایک مشترکہ بیان میں ذکر کیا گیا کہ اسرائیلی فوج نے جنوبی لبنان کے ایک گاؤں میں حزب اللہ کی جانب سے استعمال ہونے والے زیر زمین بنیادی ڈھانچے کو تباہ کر دیا ہے۔

بنیامین نیتن یاہو اور یسرائیل کاٹز کی طرف سے جاری کردہ بیان میں کہا گیا کہ اسرائیل نے امریکہ کو اس حملے کے بارے میں پہلے سے آگاہ کر دیا تھا جو قصبہ مجدل زون میں 200 میٹر لمبی سرنگ کو نشانہ بنا کر کیا گیا تھا۔

یہ حملہ لبنان اور اسرائیل کے درمیان امریکی ثالثی میں ہونے والے ایک سکیورٹی انتظامات کے معاہدے کے دو دن بعد ہوا جس کا مقصد سرحد پر کشیدگی کو کم کرنا تھا۔

معاہدے میں جنوبی لبنان کے کچھ علاقوں سے اسرائیلی انخلاء کا مرحلہ وار عمل شامل ہے جو لبنانی فوج کی تعیناتی کے ساتھ مشروط ہے، جبکہ اسرائیلی افواج کو عارضی طور پر ایک وسیع سکیورٹی زون میں رہنے کی اجازت دی گئی ہے۔

اس تنازع کے نتیجے میں 10 لاکھ سے زائد لبنانی اپنے گھر چھوڑنے پر مجبور ہوئے۔ یہ تنازع ایران کے ساتھ وسیع تر جنگ کے ساتھ جڑا ہوا ہے۔ حزب اللہ اور تہران کا کہنا ہے کہ واشنگٹن نے جنگ کے خاتمے کے لیے دو ہفتے قبل دستخط شدہ مفاہمت کی یاد داشت کے تحت لبنان میں لڑائی ختم کرنے کا وعدہ کیا تھا۔