میسی ورلڈ کپ 2026 میں سب سے زیادہ ''چلنے'' والا کھلاڑی

ارجنٹائن کے اسٹار فٹبالر میسی نے ورلڈ کپ 2026 میں سوئٹزرلینڈ کے خلاف کوارٹر فائنل سے قبل اپنی مجموعی حرکات کا 63 فیصد حصہ پیدل چلتے ہوئے گزارا، جو ٹورنامنٹ میں کسی بھی دوسرے آؤٹ فیلڈ کھلاڑی سے زیادہ ہے۔

اعداد و شمار کے مطابق میسی نے 25 فیصد وقت کھڑے رہتے ہوئے گزارا، جبکہ ان کی حرکات میں ہلکی دوڑ (jogging) کا حصہ صرف 8اعشاریہ6 فیصد رہا۔تاہم محدود حرکت کے باوجود میسی کی کارکردگی متاثر کن رہی۔

وہ حملہ آور تھرڈ میں سب سے زیادہ گیند چھونے والے کھلاڑیوں میں تیسرے نمبر پر ہیں، جبکہ 15 یقینی مواقع بنا کر بھی تیسرے نمبر پر موجود ہیں۔

مزید برآں وہ کلیان مبابی کے ساتھ 8 گول کر کے گولڈن بوٹ کی دوڑ میں مشترکہ طور پر سرفہرست ہیں۔فرانس کے سابق دفاعی کھلاڑی رفائیل واران نے میسی کے اندازِ کھیل کی وضاحت کرتے ہوئے کہا:آپ کو اپنے ساتھی کھلاڑیوں سے مسلسل رابطے میں رہنا پڑتا ہے تاکہ یہ طے ہو سکے کہ میسی کے خلاف دفاعی ذمہ داری کس کی ہے۔

میسی کی خاص بات یہ ہے کہ وہ ایسے علاقوں میں چلتے رہتے ہیں، جہاں یہ واضح نہیں ہوتا کہ ان کے خلاف دفاع کون کرے گا: مڈفیلڈر، فل بیک یا مرکزی دفاع؟

میسی اپنی حرکات کو آف سائیڈ ٹریپ سے بچنے کے لیے بھی استعمال کرتے ہیں۔ وہ اکثر ٹھہر کر ایک اچانک تیز حرکت کرتے ہیں، قانونی پوزیشن میں واپس آتے ہیں اور دفاعی لائن کے پیچھے خالی جگہ پر حملہ کرتے ہیں۔

ان کی اچانک رفتار اب بھی فیصلہ کن ثابت ہوتی ہے، کیونکہ ان کی 71 فیصد دوڑیں آخری تھرڈ میں ختم ہوتی ہیں، جبکہ 21 فیصد مخالف کے پنالٹی ایریا کے اندر مکمل ہوتی ہیں۔

سابق مانچسٹر سٹی کوچ پیپ گارڈیولا نے ایک بار میسی کے اثر کو یوں بیان کیا:وہ بظاہر صرف گھومتے پھرتے نظر آتے ہیں اور شاید ہسپانوی لیگ میں سب سے کم دوڑنے والے کھلاڑی ہوں، لیکن جب گیند ان کے پاس آتی ہے تو وہ وقت اور جگہ کا مکمل جائزہ لے چکے ہوتے ہیں کہ کون کہاں موجود ہے۔ پھر اچانک… بوم!

ورلڈ کپ 2022 میںآسٹریلیا کے اسسٹنٹ کوچ رینی میولن سٹین نے دی ایتھلیٹک کو بتایا:ہمارے خلاف میچ میں میسی نے 80 فیصد وقت صرف گھومتے ہوئے گزارا، لیکن جیسے ہی کھیل آخری تھرڈ میں داخل ہوا، انہوں نے اپنی اصل سرگرمی شروع کی، کیونکہ وہ جانتے تھے کہ وہیں وہ سب سے زیادہ مؤثر ثابت ہو سکتے ہیں۔

آرسنل کے سابق دفاعی کھلاڑی ولیم گالاس نے کہا:بطور دفاعی کھلاڑی آپ یہ نہیں چاہتے کہ میسی کو گیند ملے، اس لیے آپ ان کے قریب جانے کا سوچتے ہیں۔ لیکن اگر آپ ان کے قریب جاتے ہیں ،تو وہ پہلے ہی یہ جنگ جیت چکے ہوتے ہیں، کیونکہ اگر انہیں گیند نہ بھی ملے تو آپ نے اپنے پیچھے جگہ چھوڑ دی اور یہی وہ چاہتے ہیں۔

میسی بغیر گیند کے نسبتاً کم دفاعی کردار ادا کرتے ہیں، جس سے ان کے ساتھیوں پر دفاعی ذمہ داریاں بڑھ جاتی ہیں۔

تاہم ارجنٹائن کے سابق انٹرنیشنل فٹبالر پابلو زابالیتا نے کہا:اگر فارورڈز کو دوگنا محنت کرنا پڑے تو وہ کریں گے، کیونکہ جب گیند میسی کے پاس ہوتی ہے تو وہ جادوئی لمحات پیدا کرتے ہیں۔

یہ اعداد و شمار اس بات کی نشاندہی کرتے ہیں کہ میسی کا کھیل صرف دوڑنے پر منحصر نہیں، بلکہ صحیح وقت، درست پوزیشننگ اور اچانک فیصلہ کن حرکت پر مبنی ہے۔ یہی حکمت عملی انہیں دنیا کے سب سے مؤثر فٹبالرز میں شامل رکھتی ہے۔