مسجد حرام کے 20 مقامات جنہیں تلاش کرنا آسان!

سعودی عرب میں حرمین شریفین کے نگراں ادارے نے مسجد حرام کی زیارت اور حج وعمرہ کے لیے آنے والے فرزندان توحید کی رہ نمائی کے لیے ایک نیا طریقہ کار وضع کیا ہے۔ ادارے نے مسجد حرام اور اس کے اطراف میں مختلف مقامات پر تختیاں نصب کرنے کا فیصلہ کیا ہے جن پر ان اہم مقامات کی نشاندہی کی جائے گی جو کسی بھی عازم حج یا عمرہ کو اپنے مطلوبہ مقام تک رسائی میں مدد فراہم کرے گی۔

العربیہ ڈاٹ نیٹ کے مطابق حرمین شریفین کے ادارے نے حرم شریف میں ایسے 20 اہم مقامات مختص کیے ہیں جن تک رسائی کے لیے مختلف جگہوں پر تختیاں نصب کی جائیں گی۔ بعد ازاں مسجد حرام کے باہر لگی اسکرینوں پربھی ان مقامات کی نشاندہی کی جائے گی اور اگلے مرحلے میں یہ سہولت موبال فون پربھی دستیاب ہوگی۔

حرمین شریفین کے نگراں ادارے کے ڈائریکٹر جنرل سروز مشہور المنعمی نے بتایا کہ عموما دوسرے ملکوں یا ملک کے طول وعرض سے آنے والے عازمین حج وعمرہ کو مسجد حرام میں اپنے متعلقہ دفتر تک رسائی میں مشکل پیش آتی ہے اور انہیں بار بار مطلوبہ مقام، دفتر یا ادارے کے بارے میں معلومات لینا پڑتی ہیں۔ عازمین کے اسی استفسار کے پیش نظرہم نے مسجد حرام میں ایسے 20 اہم مراکز کے تعین کے بعد ان کی نشاندہی تختیوں کی مدد سے کرنے کا فیصلہ کیا ہے۔

ویسے تومسجد حرام میں ایسے 20 مقامات کا تعین کیا گیا تاہم اخبار’’مکہ‘‘ کے مطابق عازمین کو تختیوں کی مدد سے جن جگہوں کی نشاندہی کی جائے گی ان میں مسجد حرام کے داخلی اور خارجی دروازے، برقی زینے، وہیل چیئر حاصل کرنے کا متعلقہ دفتر، وہیل چیئر ٹریکس، خواتین اور مرد حضرات کے واش روم، امانتیں جمع کرانے کےدفتر، دارالافتاء اور گم ہوجانے والے افراد کے بارے میں قائم شکایات سیل کی نشاندہی کی جائے گی۔