.

یمن : حضرموت میں سینئر فوجی کمانڈر پر قاتلانہ حملہ

پہلی اشاعت: آخری اپ ڈیٹ:

یمن میں فرسٹ ملٹری ریجن کے کمانڈر عبدالرحمن الحلیلی کو بدھ کے روز قاتلانہ حملےکا نشانہ بنایا گیا تاہم وہ اس کارروائی میں محفوظ رہے۔ عینی شاہدین کے مطابق الحلیلی کی گاڑی کو حضرموت صوبے کے علاقے بروج القطن میں دھماکا خیز مواد سے بھری ایک گاڑی کے ذریعے نشانہ بنایا گیا۔

ذرائع کے مطابق دھماکے کے نتیجے میں فرسٹ ملٹری ریجن کے کمانڈر کے 3 ساتھی ہلاک اور 5 زخمی ہوگئے جب کہ کسی تنظیم کی جانب سے کارروائی کی ذمہ داری قبول نہیں کی گئی ہے۔ ذرائع کا کہنا ہے کہ بارود سے بھری گاڑی پھٹنے کے بعد علاقے کی فضاؤں میں عرب اتحاد کے لڑاکا طیاروں نے گشت شروع کردیا جب کہ فوجی اہل کاروں نے علاقے کو گھیرے میں لے لیا۔

یہ دہشت گرد کارروائی گزشتہ ماہ حضرموت صوبے کے صدر مقام المکلا شہر پر سرکاری فوج کے مکمل کنٹرول حاصل کرلینے اور وہاں سے القاعدہ کے مسلح عناصر کو نکال دینے کے بعد سامنے آئی ہے۔