حوثی ملیشیا نجران پر بیلسٹک میزائل داغنے میں ناکام

یمن میں آئینی حکومت کے حامی عرب فوجی اتحاد کے فضائی دفاعی نظام نے حوثیوں کی جانب سے سعودی عرب کے شہر نجران کی سمت داغے گئے بیلسٹک میزائل کو ناکام بنا دیا۔ یمنی دارالحکومت صنعاء میں حوثی باغیوں کی جانب سے داغا گیا یہ میزائل یمن کے صوبے صعدہ کے ضلعے کتاف البقع میں گرا۔

اس سے قبل یمن کی سرکاری فوج نے ہفتے کے روز اعلان کیا تھا کہ عرب اتحادی افواج کے میزائل شکن دفاعی نظام نے حوثی اور معزول صالح کی ملیشیاؤں کی طرف سے المخا کی جانب داغے گئے ایک بیلسٹک میزائل کو فضا میں ہی ناکارہ بنا دیا۔ باغیوں نے یہ میزائل الحدیدہ شہر کے جنوب میں واقع ضلعے الخوخہ کے ایک مقام سے داغا تھا۔

اسی طرح حوثی ملیشیا منگل کے روز بھی سعودی عرب کی جانب ایک بیلسٹک میزائل داغنے میں ناکام ہو گئی تھی۔ ذرائع کے مطابق شمالی یمن میں حجہ کے علاقے سے داغا جانے والا یہ میزائل بحر احمر میں جا گرا۔