مصر : مغربی سرحد پر مسلح افراد کی دراندازی کی کوشش ناکام

مصری وزارت دفاع نے پیر کے روز جاری ایک بیان میں بتایا ہے کہ فضائیہ کے طیاروں نے مغربی سرحد پر دراندازی کی ایک کوشش کو ناکام بناتے ہوئے 8 فور وہیل ڈرائیو گاڑیوں کو تباہ کر ڈالا جن میں سرحد کے راستے اسمگل کیا جانے والا اسلحہ اور گولہ بارود بھرا ہوا تھا۔

عربی اخبار "بوابۃ الاہرام" کی ویب سائٹ کے مطابق یہ کارروائی ایسے وقت میں کی گئی جب واحات کے علاقے میں دہشت گرد حملے کے بعد پہاڑی علاقوں کو دہشت گرد عناصر سے پاک کرنے کے لیے چھاپہ مار کارروائیاں جاری ہیں۔

ویب سائٹ کا یہ بھی کہنا ہے کہ مصری فضائیہ اور سرحدی محافظین کے اہل کارون کی جانب سے پورے عزم کے ساتھ اپنے فرائض کی انجام دہی جاری ہے تا کہ ریاستی سرحد کو محفوظ بنایا جا سکے اور سرحدی دراندازی یا خلاف ورزی کی کسی بھی کارروائی کو روکا جا سکے۔