حزب اللہ اپنی مشکلات سعودی عرب پر ڈال رہی ہے: بحرین

خلیجی ریاست بحرین کے وزیرخارجہ الشیخ خالد بن احمد آل خلیفہ نے کہا ہے کہ لبنانی شیعہ ملیشیا حزب اللہ اپنے جملہ مسائل، اسکینڈل اور سازشیں سعودی عرب پر ڈال رہی ہے۔

العربیہ ڈاٹ نیٹ کے مطابق مائیکرو بلاگنگ ویب سائیٹ ’ٹویٹر‘ پر پوسٹ کردہ متعدد ٹویٹس میں بحرینی وزیر خارجہ نے لکھا ہے کہ سعودی عرب ہمیشہ خوشی اور غم میں لبنان کے ساتھ رہا، مگر لبنانی شیعہ ملیشیا کی طرف سے سعودی عرب کے خلاف ہمیشہ سازشیں کی گئیں۔ اللہ تعالیٰ دہشت گردوں کی مکروہ سازشوں سے سعد حریری کو محفوظ رکھے۔

الشیخ خالد بن احمد آل خلیفہ نے لکھا کہ ’اللہ تعالیٰ لبنان کے مسلمانوں اور عیسائی برادری کو ایران اور اس کے پیروکاروں کے شرور و فتن سے محفوظ رکھے‘۔ انہوں نے استفسار کیا کہ کیا اب بھی لبنانی قوم کی آزادی کا وقت نہیں آیا۔

ان کا کہنا ہے کہ ہم نے پوری دنیا گھوم کر دیکھی مگر جب ہم بیروت جاتے ہیں تو پوری دنیا ہمارے اس خوبصورت گھر میں آجاتی ہے۔ اللہ تعالیٰ لبنان کو حزب اللہ دہشت گرد کی سازشوں سے بچائے۔

بحرینی وزیرخارجہ کا یہ بیان لبنانی وزیراعظم سعد حریری کے سعودی عرب میں استعفے کے بعد سامنے آیا ہے۔ سعد حریری نے اپنی جان کو لاحق خطرات کے پیش نظر ہفتے کے روز وزارت عظمیٰ کے عہدے سے استعفیٰ دے دیا تھا۔ انہوں نے ایران کو خبردار کیا کہ خطے کی طرف بڑھنے والے ایرانی ہاتھ کاٹ دیے جائیں گے۔