آئندہ ہفتے استعفیٰ واپس لے سکتا ہوں: سعد حریری

لبنان کے مستعفی وزیراعظم سعد حریری نے کہا ہے کہ ملک میں بعض معاملات میں ’مثبت پیش رفت‘ ہوئی ہے۔ اگر یہ پیش رفت جاری رہی تو آئندہ ہفتے استعفیٰ واپس لے لوں گا۔

خیال رہے کہ سعد حریری نے 22 نومبر کو وطن واپسی کے بعد عارضی طور پر وزارت عظمیٰ سے استعفے پر عمل درآمد روک دیا تھا۔

ایوان صدر میں صدر میشل عون کے ساتھ ملاقات کے بعد سعد حریری نے کہا کہ میں نے صدر عون کو اپنا استعفیٰ پیش کیا تھا۔ انہوں نے چند روز مزید انتظار کی خواہش کا اظہار کیا۔ استعفے کے اسباب اور اس کے سیاسی پس منظر جاننے اور صلاح مشورے کے لیے مزید وقت مانگا تو میں نے ان کی خواہش کا احترام کرتے ہوئے استعفے پر عمل درآمد روک دیا تھا۔