"کرد پیپلز پروٹیکشن" کا بشار حکومت سے عفرین میں مداخلت کا مطالبہ

شام میں کرد پیپلز پروٹیکشن یونٹس کی فورس کی سیاسی اور عسکری قیادت نے شامی حکومت سے عفرین شہر میں فوری مداخلت کا مطالبہ کیا ہے تا کہ شمالی شام میں ترکی کے فوجی آپریشن کا مقابلہ کیا جا سکے۔

مذکورہ فورس کی جانب سے جاری بیان میں بتایا گیا ہے کہ اس نے بشار حکومت سے مطالبہ کیا ہے کہ وہ کردوں کو تحفظ فراہم کرنے کے لیے عفرین میں مداخلت کرے۔ فورس کے مطابق وہ ترکی کی فوج کو روکنے کے لیے شامی حکومت کے ساتھ مل کر کام کریں گی۔

دوسری جانب ترکی کے صدر رجب طیب ایردوآن نے اعلان کیا ہے کہ ترکی کی فوج شام کی اراضی میں حلب شہر تک پیش قدمی کر سکتی ہے۔ انہوں نے باور کرایا کہ عفرین میں فوجی آپریشن جاری ہے۔ ایردوآن کے مطابق ترک عوام عفرین آپریشن کو اسی طرح سپورٹ کر رہے ہیں جس طرح وہ 2016 میں انقلاب کی کوشش کے خلاف صف آرا ہو گئے تھے۔

انقرہ حکومت نے گزشتہ ہفتے شمالی شام میں کرد مسلح گروپوں کے خلاف فوجی آپریشن کا آغاز کیا تھا۔ اس آپریشن کو "غصن الزیتون" کا نام دیا گیا ہے۔