صعدہ میں باقم کے اطراف اہم حوثی کمانڈر سمیت 20 سے زیادہ باغی ہلاک

یمن کے شمالی صوبے صعدہ میں جاری لڑائی کے دوران باقم ضلعے میں حوثی ملیشیا کا ایک اہم کمانڈر یمنی فوج کے ہاتھوں مارا گیا۔

زمینی ذرائع کے مطابق لڑائی میں حوثی کمانڈر یحیی ہاشم اور اس کے 20 سے زیادہ ساتھی ہلاک ہوئے۔

ذرائع نے مزید بتایا کہ یمنی فوج نے 15 حوثیوں کو قیدی بھی بنا لیا۔ اس سے قبل یمنی فوج دو سمتوں سے باقم ضلعے کے مرکز کے اطراف پہنچی تھی۔

یمن کی مسلح افواج کے میڈیا سینٹر کے مطابق سرکاری فورسز نے گزشتہ چند گھنٹوں کے دوران باقم ضلعے کے مرکز کے اطارف کئی علاقوں کو کلیئر کرا لیا۔ ان میں جبل راس، جبل عرف، آل صرہ کے زرعی علاقے اور آل مغرم کے دیہات شامل ہیں۔

یمنی فوج کے بریگیڈ 102 کے کمانڈر یاسر الحارثی کے مطابق باقم ضلعے کے مرکز کی مشرقی جانب حوثی باغیوں کے ساتھ لڑائی جاری ہے۔

الحارثی نے بتایا کہ یمنی فوج کو کلیئر کرائے گئے علاقوں سے حوثی ملیشیا کے جنگجوؤں کی تیس سے زیادہ لاشیں ملی ہیں۔