یمنی فوج کا باقم کا محاصرہ ، دو کمانڈر سمیت درجنوں حوثی ہلاک و زخمی

یمن میں صعدہ صوبے کے ضلعے باقم میں سرکاری فوج اور حوثی ملیشیا کے درمیان گھمسان کی لڑائی میں درجنوں حوثی باغی مارے گئے جب کہ متعدد زخمی ہو گئے۔ مارے جانے والوں میں دو اہم کمانڈر شامل ہیں۔

عسکری ذریعے کے مطابق یمنی افواج نے باقم ضلعے کے مرکزی حصّے کا تمام سمتوں سے گھیراؤ کر لیا۔ اس دوران یمنی فوج نے عرب اتحاد کی فورسز کی معاونت سے اپنی پیش قدمی جاری رکھی۔

ذریعے نے واضح کیا کہ یمنی فوج نے "آل معيض" اور "آل الحماقی" کے دیہات آزاد کروا لیے۔ اس کے علاوہ ان علاقوں میں ایران نواز حوثی ملیشیا کے زیر استعمال ہتھیاروں کے گوداموں اور لڑائی کے سامان کو تباہ کر دیا۔

عسکری ذریعے کے مطابق لڑائی کے دوران حوثی ملیشیا کو بھاری جانی نقصان پہنچا۔ باغیوں کے درجنوں ارکان ہلاک اور زخمی ہو گئے جن میں ابو غلاب اور ابو فائز نامی دو اہم کمانڈر شامل ہیں۔