.

ایران نے ہمیں امریکیوں پر حملے کے حوالے سے آگاہ کر دیا تھا: عراقی وزیراعظم

پہلی اشاعت: آخری اپ ڈیٹ:

عراق کے نگراں وزیراعظم عادل عبدالمہدی نے تصدیق کی ہے کہ ایران نے عراق میں امریکیوں پر حملوں کے حوالے سے بغداد کو آگاہ کر دیا تھا۔

انہوں نے بتایا کہ تہران نے بغداد حکومت کو یقین دہانی کرائی تھی کہ بم باری امریکی فوج کے ٹھکانوں تک محدود رہے گی۔

عبدالمہدی کے مطابق ابھی تک انہیں عراقی یا امریکی فوج کی صفوں میں کسی جانی نقصان کی خبر نہیں ملی۔

عراقی وزیراعظم نے باور کرایا کہ یہ بحران سنگین ہے جس نے خطے اور دنیا کو ایک تباہ کن جنگ کے خطرے سے دوچار کر دیا ہے۔ عبدالمہدی نے عراق کی خود مختاری کی کسی بھی خلاف ورزی اور عراقی سرزمین پر حملے کو مسترد کر دیا۔

عراقی مسلح افواج کے کمانڈر انچیف کے ترجمان کے مطابق ایران کی جانب سے قاسم سلیمانی کی ہلاکت سے متعلق جوابی کارروائی کے حوالے سے سرکاری طور پر زبانی پیغام موصول ہوا۔

قاسم سلیمانی گذشتہ جمعے کے روز بغداد کے بین الاقوامی ہوائی اڈے سے باہر آتے ہوئے گاڑی پر امریکی بم باری کے نتیجے میں مارا گیا تھا۔