سعودی عرب کا آئندہ سال نجکاری کے 160 معاہدوں کا اعلان

سعودی عرب کے وزیر خزانہ محمد الجدعان نے آج جمعرات کو کہا ہے کہ مملکت نجکاری کے 160 سودوں کی تیاری کر رہی ہے اور آئندہ سال ان میں سے مزید نجکاری معاہدوں کے اعلان کرنے کا ارادہ رکھتی ہے۔

مالیاتی استحکام سمپوزیم میں خطاب میں وزیر خزانہ نے مزید کہا کہ تعلیم اور لاجسٹکس کے شعبوں میں اداروں کی نجکاری کے منصوبے اپنے زیر غور ہیں۔

اس سال کے شروع میں مملکت نے راس الخیر ڈی سیلینیشن اور پاور پلانٹ کی نجکاری کو معطل کر دیا تھا جو کہ سرکاری ملکیت کے متعدد اثاثوں میں سے ایک ہے جسے حکومت نے تیل پر انحصار کیے بغیر سرمائے کے اخراجات پر دباؤ کم کرنے اور محصولات کو متنوع بنانے کے لیے فروخت کرنے کا ہدف بنایا ہے۔

وزیر خزانہ الجدعان نے کہا کہ سعودی حکومت حقیقت پسندانہ، شفاف اور ذمہ دارانہ طریقہ کار کے ساتھ کرونا وائرس کی وبا سے نمٹنے کے لیے پالیسیاں اپنا رہی ہے۔

الجدعان نے وضاحت کی کہ یہ اقدامات مملکت کو بحالی اور استحکام کی راہ پر گامزن کرتے ہیں۔

وزیر خزانہ کاکہنا تھا کہ حکومت نے مالیاتی اصلاحات کا ایک سیٹ شروع کیا ہے جس کا مقصد معیشت میں ایک جامع اور مکمل تبدیلی لانا ہے تاکہ ایک بڑی ترقیاتی تبدیلی لائی جا سکے۔

انہوں نے مزید کہا کہ مملکت کی معیشت گذشتہ سال کے وسط سے بتدریج بحالی کی طرف گامزن ہے۔