داعش نے عمان میں مسجد پر حملے کی ذمے داری قبول کر لی

دہشت گرد تنظیم داعش نے منگل کی شام جاری بیان میں سلطنت عُمان میں ایک مسجد پر ہونے والے حملے کی ذمے داری قبول کر لی ہے۔

حملے میں دار الحکومت مسقط کے علاقے الوادی الکبیر میں واقع مسجد علی بن ابی طالب کو فائرنگ کا نشانہ بنایا گیا۔ واقعے میں تین حملہ آوروں سمیت کم از کم 9 افراد ہلاک ہوئے۔

عمان کی پولیس نے منگل کے روز سوشل میڈیا پلیٹ فارم "ایکس" پر اس حملے سے متعلق بیان جاری کیا تھا۔ بیان میں بتایا گیا کہ "حملے کے دوران میں ایک پولیس اہل کار سمیت چھ افراد ہلاک ہوئے جب کہ تین حملہ آور بھی مارے گئے۔ ان کے علاوہ مختلف شہریتوں کے حامل 28 افراد زخمی ہو گئے جن میں پولیس اور شہری دفاع کے 4 عمانی اہل کار بھی شامل ہیں"۔