متحدہ عرب امارات کی جانب سے قطر پر حملے کی شدید مذمت

متحدہ عرب امارات نے ایرانی پاسدارانِ انقلاب کی جانب سے قطر میں قائم العدید ایئر بیس کو نشانہ بنانے کی شدید ترین الفاظ میں مذمت کی ہے۔ اماراتی وزارتِ خارجہ نے اسے قطر کی خودمختاری اور فضائی حدود کی کھلی خلاف ورزی قرار دیتے ہوئے کہا کہ یہ اقدام بین الاقوامی قانون اور اقوامِ متحدہ کے چارٹر کی صریح خلاف ورزی ہے۔

وزارتِ خارجہ نے ایک بیان میں قطر کے ساتھ مکمل یکجہتی کا اظہار کرتے ہوئے کہا کہ اماراتی قیادت قطری عوام اور وہاں مقیم افراد کی سلامتی کے لیے ہر ممکن حمایت جاری رکھے گی۔

بیان میں واضح کیا گیا کہ متحدہ عرب امارات خطے کے امن و استحکام کو متاثر کرنے والے ہر اقدام کو مسترد کرتا ہے اور ایسے کسی بھی حملے کی سخت مخالفت کرتا ہے جو قطر کی سکیورٹی کو خطرے میں ڈالے۔

وزارتِ خارجہ نے فوری طور پر عسکری کشیدگی کے خاتمے پر زور دیتے ہوئے خبردار کیا کہ اگر ایسے اشتعال انگیز اقدامات جاری رہے تو اس کے خطرناک نتائج برآمد ہوں گے، جو نہ صرف خطے بلکہ دنیا بھر کے امن و امان کے لیے نقصان دہ ہوں گے۔

اماراتی وزارت خارجہ نے موجودہ بحرانوں کے حل کے لیے سفارتی ذرائع اور حسنِ ہمسائیگی کے اصول اپنانے کی اہمیت پر زور دیتے ہوئے کہا کہ سنجیدہ مکالمہ ہی خطے کے تحفظ، استحکام اور عوام کے امن کی ضمانت ہے۔