مصری نوجوان کا لڑکی پر تشدد، ویڈیو وائرل ہونے پر تحقیقات شروع

مصر میں سوشل میڈیا پر وائرل ہونے والی ایک ویڈیو نے عوامی حلقوں میں شدید غم و غصے کی لہر جنم دی ہے، جس میں ایک نوجوان کو ایک لڑکی پر جسمانی حملہ کرتے ہوئے دیکھا جا سکتا ہے۔ واقعہ اسکندریہ شہر کے کورنیچ پر واقع "محطۃ الرمل" کے علاقے میں پیش آیا۔

ویڈیو میں دیکھا جا سکتا ہے کہ ایک نوجوان پہلے لڑکی سے چھیڑ چھاڑ کرتا ہے اور جب لڑکی نے اس کی توجہ کو روکا تو اس نے پیچھے سے آ کر زور دار لات ماری، جس سے وہ زمین پر گر گئی۔ نوجوان موقع سے فرار ہو گیا۔

مصری حکام نے اس ویڈیو کی جانچ شروع کر دی ہے تاکہ واقعے کے پس منظر اور ملزم کی شناخت کی جا سکے اور قانونی کارروائی کی جا سکے۔

مصری ذرائع ابلاغ کے مطابق انسداد دہشت گردی اور کرپشن کے خلاف قومی مہم کے کوآرڈینیٹر محمد توفیق نے بتایا کہ انہوں نے ویڈیو کے ساتھ ایک باضابطہ شکایت وٹس ایپ کے ذریعے پراسیکیوشن کو ارسال کی ہے۔

توفیق کے مطابق یہ اقدام اس ہدایت کی روشنی میں کیا گیا ہے جو مصر کی پراسیکیوشن کی جانب سے شہریوں کو دی گئی تھی کہ وہ ایسے واقعات کی اطلاع وٹس ایپ پر ویڈیو ثبوت کے ساتھ دے سکتے ہیں۔

انہوں نے مزید بتایا کہ پراسیکیوشن نے فوری ردعمل دیتے ہوئے ویڈیو کا تجزیہ شروع کر دیا ہے، جب کہ سکیورٹی اداروں نے ملزم کو گرفتار کرنے کے لیے ایک خصوصی تحقیقاتی ٹیم تشکیل دے دی ہے۔