غزہ کے باشندوں کو 'روٹی کے ایک ٹکڑے' کے لیے مرنا نہیں چاہیے: ترک صدر

ترکیہ کے صدر رجب طیب ایردوآن نے منگل کو خبردار کیا ہے کہ "روٹی کے ایک ٹکڑے یا ایک گھونٹ پانی" کی خواہش میں فلسطینیوں کا مرنا ناقابلِ قبول ہو گا۔

استنبول میں ایک تقریر کے دوران دیا گیا یہ انتباہ غزہ جنگ پر بڑھتی ہوئی بین الاقوامی تنقید اور اسرائیل کی مذمت کے درمیان سامنے آیا ہے۔

ایردوآن نے کہا، "کوئی کم ترین انسانی وقار کا حامل شخص بھی اس ظلم کو قبول نہیں کر سکتا کہ روزانہ درجنوں بے گناہ لوگ اس لیے مرتے ہوں کیونکہ انہیں روٹی کا ایک ٹکڑا یا پانی کا ایک گھونٹ نہیں ملتا۔"

ایردوآن اسرائیل پر اکثر تنقید کرتے ہیں لیکن ان کا یہ اعلان اس وقت سامنے آیا ہے جب اسرائیل کو اقوامِ متحدہ کے اداروں اور بین الاقوامی دارالحکومتوں کی جانب سے شہریوں کی جانوں کے تحفظ اور غزہ میں امداد کی اجازت دینے کے متعدد مطالبات کا سامنا ہے۔

یورپی یونین کی سربراہ برائے خارجہ پالیسی کاجا کالاس نے کہا، اسرائیلی افواج کو خوراک کی تقسیم کے مقامات پر "لوگوں کا قتل بند کرنا چاہیے" جبکہ اقوامِ متحدہ کے حقوق کے سربراہ وولکر ترک نے اسرائیل کو خبردار کیا کہ وہ ممکنہ طور پر بین الاقوامی قوانین کی خلاف ورزی کر رہا ہے۔

غزہ کی سول ڈیفنس ایجنسی نے کہا ہے کہ منگل کے روز فلسطینی علاقے میں اسرائیلی حملوں میں 15 افراد ہلاک ہو گئے جبکہ عالمی ادارۂ صحت نے کہا کہ اسرائیلی فوجیوں نے اس کے عملے کی رہائش گاہ پر حملہ کیا۔