غزہ: سکول پر حملے میں پانچ افراد کی اموات، مسجد اقصیٰ کے مفتی کو بے دخل کر دیا گیا

غزہ شہر کے مغرب میں سینکڑوں بے گھر افراد کو پناہ دینے والے ایک سکول پر اسرائیلی فوج کے حملے میں پانچ فلسطینی جان سے گئے اور تقریباً 30 دیگر زخمی ہو گئے ہیں۔ مرنے والوں اور زخمیوں میں بچے اور خواتین بھی شامل ہیں۔ جمعہ کے روز فجر سے لیکر رات تک اسرائیلی حملے جاری رہے۔ اسرائیلی بمباری سے غزہ کی پٹی میں شہید ہونے والوں کی تعداد 27 ہو گئی ہے۔

فلسطینی طبی ذرائع نے بتایا کہ شہداء میں سے چار امداد کے منتظر تھے ۔ کچھ زخمیوں کی حالت تشویشناک ہے جس سے ہلاکتوں میں اضافے کا خدشہ ہے۔

مقبوضہ بیت المقدس شہر میں اسرائیلی قابض افواج نے القدس کے مفتی کو حراست میں لے لیا اور انہیں کئی دنوں کے لیے مسجد اقصیٰ سے بے دخل کرنے کا حکم دیا ہے۔ یہ ایک کشیدگی کا قدم ہے جس کا مقصد مذہبی علامتوں کو نشانہ بنانا اور مقبوضہ شہر میں عبادت کی آزادی کو کمزور کرنا ہے۔