مصر : بجلی گرنے کے واقعات میں ایک بچے سمیت 3 شہری جاں بحق

مصر میں بارشوں اور خراب موسم کے باعث تین افراد جاں بحق ہو گئے جن میں ایک بچہ بھی شامل ہے۔ شمالی مصر کے البحیرہ صوبے میں مختلف حادثات کے دوران یہ اموات پیش آئیں۔

مقامی حکام کے مطابق دمنہور، ایتائی البارود اور کفر الدوار کے علاقوں میں پیر کے روز تین الگ الگ واقعات پیش آئے، جن میں تین شہریوں کی موت ہوئی، جبکہ ایک خاتون زخمی اور ایک جانور ہلاک ہوا۔

دمنهور میں پولیس کو اطلاع ملی کہ 37 سالہ کسان انور کو بجلی گرنے سے جھلسنے کے بعد اسپتال لایا گیا، مگر وہ جانبر نہ ہو سکا۔ اسی واقعے میں 27 سالہ ہاجر. س. ش. زخمی ہوئی، جس کے بازو اور ران پر جھلسنے کے زخم آئے۔

ايتائی البارود کے اسپتال سے اطلاع ملی کہ 11 سالہ عبدالرحمن. ع. س. بجلی گرنے سے جاں بحق ہو گیا۔ وہ الضہریہ گاؤں میں ایک زرعی زمین پر موجود تھا جب یہ واقعہ پیش آیا، جس سے ایک جانور بھی ہلاک ہو گیا۔

کفر الدوار میں بھی 23 سالہ احمد. ف. س. بجلی گرنے سے جاں بحق ہوا۔

مصر کے مختلف علاقوں میں ان دنوں ایک فضائی دباؤ کی لہر کے باعث موسم شدید غیر مستحکم ہے۔ اس سبب دارالحکومت قاہرہ سمیت کئی صوبوں میں بارشیں ہو رہی ہیں، جبکہ دھند کے باعث شاہراہوں پر حدِ نگاہ کم ہو گئی ہے۔

مصری محکمہ موسمیات کے مطابق آئندہ دنوں میں بھی وقفے وقفے سے ہلکی سے درمیانی شدت کی بارشیں متوقع ہیں، خاص طور پر بحیرہ روم سے متصل ساحلی صوبوں میں، جن میں مطروح، اسکندریہ، البحیرہ، کفر الشیخ، دقہلیہ اور بورسعید شامل ہیں، جب کہ وسطی علاقوں جیسے منوفیہ، غربیہ، شرقیہ اور قاہرہ کے بعض حصوں میں بھی بارش کے امکانات ہیں۔