حوثی گروہ نے یمن کے دارالحکومت صنعاء میں اقوامِ متحدہ کے ہائی کمشنر برائے مہاجرین (UNHCR) کی ایک سابق خاتون ملازمہ کو ان کے گھر سے اغوا کر لیا۔
حقوقی اور میڈیا ذرائع کے مطابق حوثیوں کے سیکیورٹی و انٹیلی جنس اہلکاروں نے شارع ہائل میں واقع فتحیہ حسین علی الحدّاء کے گھر پر چھاپہ مارا اور انہیں نامعلوم مقام پر منتقل کر دیا۔
ذرائع کا کہنا ہے کہ حوثیوں نے گھر میں موجود تمام سامان، بشمول موبائل فونز اور الیکٹرانک آلات بھی ضبط کر لیے۔
اطلاعات کے مطابق فتحیہ چار بچوں کی ماں ہیں اور ماضی میں سوڈان میں اقوامِ متحدہ کے ادارہ برائے مہاجرین کے ساتھ کام کر چکی ہیں۔
بعد ازاں وہ صنعاء واپس آ کر ایک کنڈرگارٹن میں تدریس سے وابستہ تھیں۔
ذرائع کے مطابق ان کے اغوا کی وجہ ایک ساتھی کی مبینہ مخبری بنی۔یہ واقعہ ایسے وقت میں پیش آیا ہے جب حوثی کنٹرول والے علاقوں میں اقوامِ متحدہ اور امدادی اداروں کے کارکنوں کے اغوا کے واقعات میں اضافہ دیکھا جا رہا ہے۔
حوثی حکام اس وقت بھی 73 اقوامِ متحدہ کے اہلکاروں اور درجنوں بین الاقوامی و غیر سرکاری تنظیموں کے کارکنوں کو حراست میں رکھے ہوئے ہیں، جبکہ بعض کے خلاف جاسوسی کے الزامات کے تحت مقدمات بھی شروع کیے جا چکے ہیں۔
