لندن کے اگلے میئر کے لیے ترکی آل الشیخ جیسی شخصیت کی حمایت

لندن ٹیکسیز کے ڈائریکٹر اسٹیو میکنمارا (Steve McNamara)نے خواہش ظاہر کی ہے کہ آئندہ لندن کا میئر ایسی شخصیت ہو جو ترکی آل الشیخ جیسی عالمی سطح پر اثر و رسوخ اور نمایاں مقام رکھتی ہو۔ انہوں نے یہ بات برطانوی اخبار'' ٹیکسی نیوز پیپر '' کو انٹرویو میں کہی۔

میکنمارا (McNamara)کے مطابق حالیہ دنوں میں انہیں ٹیکسی ڈرائیورز کی بڑی تعداد سے پیغامات اور فون کالز موصول ہوئے ہیں، جن میں انہوں نے ترکی آل الشیخ کا شکریہ ادا کرنے کی درخواست کی ہے۔

ان کا کہنا تھا کہ یہ اس بات کی علامت ہے کہ جنرل انٹرٹینمنٹ اتھارٹی کے چیئرمین کو تفریحی شعبے کی ترقی اور بڑے باکسنگ مقابلوں کے انعقاد کے حوالے سے کتنی قدر کی نگاہ سے دیکھا جاتا ہے۔

اسی دوران ترکی آل الشیخ نے بھی لندن کے ٹیکسی ڈرائیورز کے لیے اپنے ''ایکس'' اکاؤنٹ پر پیغام جاری کیا، جس میں انہوں نے کہا کہ 2026 کی آخری سہ ماہی میں ایک بڑا ایونٹ منعقد ہوگا اور لندن کے ٹیکسی ڈرائیورز کو اس میں خصوصی مہمان کے طور پر مدعو کیا جائے گا۔

انہوں نے مزید کہا کہ وہ اس دن کے لیے اپنی تعطیلات کا شیڈول ترتیب دیں اور لوگوں کو پیدل چلنے دیں، کیونکہ ان کے مطابق پیدل چلنا صحت کے لیے مفید ہے۔

یہ پیش رفت ایسے وقت میں سامنے آئی ہے جب '' موسمِ ریاض '' نے بین الاقوامی سطح پر نمایاں مقام حاصل کیا ہے اور باکسنگ سمیت بڑے کھیلوں کے ایونٹس کے ذریعے عالمی توجہ حاصل کی ہے۔

لندن میں بھی حالیہ عرصے کے دوران کئی اہم باکسنگ مقابلے منعقد ہوئے ہیں جن میں ہزاروں افراد نے شرکت کی، اور ان تقریبات نے کھیل اور تفریح کے شعبے میں نئی دلچسپی پیدا کی ہے۔