سعودی عرب اور روس کے درمیان ویزہ فری انٹری کے معاہدے پر عمل درآمد کا آغاز

سعودی عرب اور روس کے شہریوں کے لیے وزٹ ویزا سے باہمی استثنیٰ کا معاہدہ آج سے نافذ العمل ہو گیا ہے۔ اس معاہدے میں تمام اقسام کے پاسپورٹس (سفارتی، خصوصی اور عام) شامل ہیں۔ روس وہ پہلا ملک بن گیا ہے جس کے ساتھ مملکت نے عام پاسپورٹ رکھنے والوں کے لیے بھی ویزا استثنیٰ کا باہمی معاہدہ کیا ہے۔

اسی تناظر میں ویزا سے یہ باہمی استثنیٰ دونوں ممالک کے شہریوں کو زیارت، سیاحت، کاروبار یا رشتہ داروں اور دوستوں سے ملاقات کی غرض سے بغیر ویزا داخلے کی اجازت دیتا ہے۔ اس معاہدے کے تحت ایک کیلنڈر سال میں مسلسل 90 روز یا وقفے وقفے سے قیام کیا جا سکتا ہے۔ تاہم اس استثنیٰ میں کام (ورک ویزا)، تعلیم، مستقل رہائش اور حج کے لیے آنے والے شامل نہیں ہیں اور ان مقاصد کے لیے مخصوص ویزا حاصل کرنا لازم ہوگا۔

اس معاہدے کا نفاذ ایک ایسے وقت میں ہوا ہے جب دونوں ممالک اور عوام سعودی روس سفارتی تعلقات کے 100 سال مکمل ہونے کا جشن منا رہے ہیں۔ اس اقدام سے باہمی دوروں میں اضافے کے ساتھ ساتھ سیاحتی، اقتصادی اور ثقافتی تعاون کو فروغ ملے گا۔ یہ معاہدہ مختلف شعبوں کو مستحکم کرنے میں معاون ثابت ہوگا جس سے دونوں ممالک اور عوام کے درمیان تعاون اور شراکت داری کے نئے دور کا آغاز ہوگا۔