بحرین کی دفاعی فورس کی جنرل کمان نے بدھ کے روز ایک بیان میں کہا ہے کہ ایران اپنی جارحانہ اور منظم پالیسی کے تحت بحرین میں شہری تنصیبات کو میزائلوں اور ڈرونز کے ذریعے نشانہ بنانے کا سلسلہ جاری رکھے ہوئے ہے۔
بیان کے مطابق بحرین کے فضائی دفاعی نظام نے بھرپور تیاری اور اعلیٰ جنگی استعداد کا مظاہرہ کرتے ہوئے 3 میزائلوں اور متعدد ڈرونز کو کامیابی سے فضا میں ہی تباہ کر دیا۔
جنرل کمان نے کہا کہ بحرین کی تمام مسلح افواج اور دفاعی یونٹس ملک کے دفاع اور سلامتی کے تحفظ کے لیے مکمل طور پر تیار اور اعلیٰ ترین سطح کی دفاعی چوکسی پر موجود ہیں۔
بحرینی حکام نے عوام سے اپیل کی ہے کہ ایرانی حملوں کے نتیجے میں گرنے والے کسی بھی مشتبہ یا نامعلوم شے کے قریب نہ جائیں، اسے ہاتھ نہ لگائیں اور ایسی کسی بھی چیز کی فوری اطلاع متعلقہ حکام کو دیں۔
تعلن القيادة العامة لقوة دفاع البحرين أن إيران تواصل نهجها العدائي الممنهج عبر اعتداءاتها الآثمة بالصواريخ والطائرات المسيرة التي تستهدف الأعيان المدنية في مملكة البحرين.https://t.co/9KexVKyeIe pic.twitter.com/oUNRG4EkG9
— قوة دفاع البحرين (@BDF_Bahrain) June 3, 2026
بحرین کی دفاعی فورس کی جنرل کمان نے کہا کہ رائل فیلڈ انجینئرنگ یونٹ کے اہلکار کسی بھی مشتبہ یا حملوں کے نتیجے میں گرنے والی اشیا سے محفوظ انداز میں نمٹنے کے لیے مکمل طور پر تیار ہیں، تاکہ تمام شہریوں اور مقیم افراد کی سلامتی کو یقینی بنایا جا سکے۔
بیان میں زور دیا گیا کہ شہری تنصیبات اور نجی املاک کو میزائلوں اور ڈرونز کے ذریعے جان بوجھ کر نشانہ بنانا بین الاقوامی انسانی قانون کی صریح خلاف ورزی ہے۔
جنرل کمان نے بحرین کی دفاعی فورس کے جوانوں کی پیشہ ورانہ مہارت، اعلیٰ جنگی تیاری اور غیرمعمولی چوکسی پر فخر کا اظہار کرتے ہوئے کہا کہ وہ وطن کے دفاع اور قومی سلامتی کے تحفظ کے مقدس فریضے کی انجام دہی میں پوری مستعدی سے مصروف ہیں۔
