اقوامِ متحدہ کے عالمی غذائی پروگرام (ڈبلیو ایف پی) نے کہا کہ ایران جنگ کے باعث لاکھوں افراد شدید فاقوں کے دہانے پر ہیں جیسا کہ ادارے نے خبردار کیا تھا کہ تنازعہ بڑھنے اور تیل کی قیمتیں بلند ہونے کی صورت میں ایسا ہو گا۔
عالمی غذائی پروگرام نے کہا، تین کمزور ممالک کے تجزیے سے پتا چلا ہے کہ صومالیہ میں اضافی 2.5 ملین، افغانستان میں 2.3 ملین اور سری لنکا میں 1.3 ملین افراد اپنی بنیادی غذائی ضروریات پورا کرنے کے لیے جدوجہد کر رہے ہیں۔
مارچ میں ڈبلیو ایف پی نے پیش گوئی کی تھی کہ جون کے آخر تک 45 ملین افراد غذائی عدم تحفظ کا نشانہ بن سکتے ہیں۔ اس سے تمام دنیا کے 318 ملین لوگوں کے مسائل مزید شدت اختیار کر جائیں گے جو پہلے ہی غذائی عدم تحفظ کا شکار ہیں۔
ڈبلیو ایف پی کے قائم مقام ایگزیکٹو ڈائریکٹر کارل سکاؤ نے اقوامِ متحدہ کے نامہ نگاروں کو بتایا، "ہم اسی پیشین گوئی پر قائم ہیں۔ اس کی بنیادی وجہ یہ ہے کہ توانائی اور خوراک کی قیمتوں میں باہمی ربط کئی جگہوں پر بہت سخت ہے اور یہ بھی کہ غریب ترین ممالک میں لوگ پہلے ہی اپنی تمام رقم خوراک پر خرچ کر رہے ہیں اور اسی لیے جب خوراک کی قیمتیں بڑھتی ہیں تو ان کا کھانا کم ہو جاتا ہے۔"
ڈبلیو ایف پی نے جمعرات کے اواخر میں جاری کردہ اپنی رپورٹ میں کہا، اس کے نتائج سے ظاہر ہوتا ہے کہ شرقِ اوسط بحران خاص طور پر خوراک اور ایندھن کی قیمتوں میں "خاطرخواہ اضافہ" اور تجارت میں خلل پیدا کر رہا ہے۔ روم میں قائم اقوامِ متحدہ کی ایجنسی نے کہا، خاص طور پر پہلے سے ہی کمزور ممالک میں یہ عوامل باہم مربوط ہو جاتے ہیں اور غذائی تحفظ اور معاش پر تیزی سے اثر انداز ہوتے ہیں۔
ڈبلیو ایف پی نے کہا، "آئندہ مہینوں میں ان اثرات کے شدت اختیار کرنے کی توقع ہے خواہ شرقِ اوسط بحران کم ہی ہو جائے۔"
سکاؤ نے غذائی عدم تحفظ کے حامل دیگر ممالک کا حوالہ دیا جن میں سوڈان، غزہ، جنوبی لبنان، یمن اور ہیٹی شامل ہیں۔
ڈبلیو ایف پی کو مالی اعانت میں کٹوتیوں کے باعث لاکھوں ضرورت مند لوگوں کی امداد محدود کرنا پڑی اور سکاؤ نے عطیہ دہندگان پر زور دیا ہے کہ وہ آگے بڑھیں خاص طور پر صومالیہ اور افغانستان کے لیے "کیونکہ مزید کام نہ کرنے کے انسانی اثرات بہت گہرے ہوں گے۔"
