فلسطینی فیڈریشن کے صدر کو ورلڈ کپ میں شرکت سے روک دیا گیا

فلسطینی فٹ بال فیڈریشن کے صدر جبریل الرجوب نے ’’ فرانس پریس" ایجنسی کو بتایا ہے کہ انہیں میکسیکو سٹی میں جمعرات کو شروع ہونے والے 2026 کے فٹ بال ورلڈ کپ کی سرگرمیوں میں شرکت کے لیے امریکہ اور کینیڈا کے انٹری ویزے نہیں مل سکے۔

جبریل الرجوب نے "فرانس پریس" کے ساتھ ایک ٹیلی فونک گفتگو میں بتایا کہ انہوں نے اردن کے دارالحکومت عمان میں درخواست دینے کے بعد مجھے امریکہ کا ویزا نہیں دیا۔ وہ اپنے رویے میں مضحکہ خیز ہیں۔ میں اس وقت میکسیکو میں ہوں، میں 14 جون کو مونٹیری میں سویڈن کے خلاف تیونس کی ٹیم کا میچ دیکھوں گا اور پھر وطن واپس لوٹ جاؤں گا۔

جبریل الرجوب نے "فرانس پریس" کو بتایا کہ انہیں کینیڈا کا ویزا بھی نہیں ملا جو امریکہ اور میکسیکو کے ساتھ مل کر 2026 کے ورلڈ کپ کی میزبانی کر رہا ہے۔ انہوں نے کہا کہ پچھلی بار، مائیگریشن ڈیپارٹمنٹ نے میرا ویزا مسترد کرنے کی کوشش کی تھی، پھر وزارت خارجہ نے مداخلت کر کے حل نکالا تھا لیکن اس بار ہمیں ویزا نہیں ملا۔

جبریل الرجوب نے اسرائیل پر ویزے نہ ملنے کے لیے دباؤ ڈالنے کا الزام عائد کرتے ہوئے کہا کہ یقیناً اسرائیلیوں نے دباؤ ڈالا ہے ۔ کچھ ایسے حلقے ہیں جو یہ نہیں چاہتے کہ ہم اسرائیل پر تنقید کریں۔ جبریل الرجوب نے مزید کہا کہ انہوں نے بین الاقوامی فیڈریشن (فیفا) کے پاس اعتراض درج کرا دیا ہے۔ انہوں نے کہا کہ وہ انٹری ویزا حاصل کرنے کے حق پر اصرار جاری رکھیں گے۔

جبریل الرجوب نے گزشتہ اپریل میں کینیڈا کے شہر وینکوور میں بین الاقوامی فیڈریشن "فیفا" کی کانفرنس میں شرکت کی تھی جب انہوں نے فیفا کے صدر جیانی انفانٹینو کی دعوت پر اسرائیلی فیڈریشن کے ایک عہدیدار کے ساتھ گروپ فوٹو میں شرکت کرنے سے انکار کر دیا تھا۔ فلسطینی فیڈریشن نے کھیلوں کی ثالثی عدالت "کاس" میں ایک اپیل دائر کی ہے جس میں فیفا کی جانب سے اسرائیل پر پابندیاں عائد کرنے سے انکار پر اعتراض کیا گیا ہے کیونکہ مغربی کنارے میں واقع کلب اسرائیلی فیڈریشن کی زیرِ نگرانی مقابلوں میں حصہ لے رہے ہیں۔