یو کے ایم ٹی او کو یمن کے الحدیدہ سے 30 بحری میل جنوب مغرب میں واقعے کی اطلاع ملی

برطانوی فوج نے کہا کہ یمن کے ساحل کے قریب بحیرۂ احمر میں اتوار کو ایک مال بردار بحری جہاز پر حملہ ہوا جو یمن کے قریب تازہ ترین سمندری حملہ ہے۔

یونائیٹڈ کنگڈم میری ٹائم ٹریڈ آپریشنز (یو کے ایم ٹی او) کے مرکز نے اطلاع دی کہ یہ حملہ ساحلی شہر الحدیدہ کے قریب ہوا جو ایرانی حمایت یافتہ حوثیوں کے کنٹرول میں ہے۔

یو کے ایم ٹی او نے بتایا کہ جہاز الحدیدہ سے 30 بحری میل (55 کلومیٹر) جنوب مغرب میں "نامعلوم مسلح حملہ آوروں کے حملے کی زد میں" آیا۔

یو کے ایم ٹی او نے کہا کہ ایک چھوٹی کشتی نے بڑی تعداد میں مال لے جانے والے جہاز کے قریب پہنچ کر فائر کھول دیا جس سے جہاز کے سکیورٹی گارڈز جوابی فائرنگ کرنے پر مجبور ہو گئے۔ پھر وہ تقریباً دو بحری میل (3.7 کلومیٹر) دور ایک بڑے جہاز پر واپس چلے گئے جس نے اپنا خودکار شناختی نظام بند کر رکھا تھا۔

برطانوی فوجی ایجنسی نے کہا کہ مال بردار جہاز اور عملہ محفوظ بتایا گیا ہے۔ حکام نے مزید کہا ہے کہ اس کی تحقیقات کر رہے ہیں۔

فوری طور پر کسی گروپ نے حملے کی ذمہ داری قبول نہیں کی۔