بھارت: فوجی کیمپ حملے کے ردعمل میں پاکستان کو سنگین نتائج کی دھمکی

بھارت کی وزیر دفاع نرملا ستھیارامان نے دھمکی دی ہے کہ پاکستان کو جموں کے حصے سنجوان میں بھارتی فوجی کیمپ پر حملے کی قیمت چکانا پڑے گی۔

بھارتی وزیر دفاع نے پاکستان پر الزام لگاتے ہوئے کہا کہ سنجوان میں فوجی کیمپ پر حملے میں جیش محمد کے عسکریت پسند ملوث تھے اور پاکستان کی جانب سے ان دہشت گردوں کو مدد فراہم کی گئی تھی۔

بھارتی وزیر دفاع کا مزید کہنا تھا کہ پاکستان کو ثبوتوں کی فراہمی معمول کے مطابق جاری ہے اور ہر مرتبہ یہ ثابت ہوتا ہے کہ پاکستان اس کا ذمہ دار ہے لہٰذا پاکستان کو اس غلطی کی قیمت چکانا پڑے گی۔‘‘

دوسری جانب پاکستان کے وزارت خارجہ کی جانب سے بھارتی میڈیا کے الزامات کو یکسر مسترد کردیا ہے۔

اس سے قبل بھارت کے زیرِ انتظام کشمیر میں سیکیورٹی فورسز کے کیمپ پر عسکریت پسندوں کے حملے میں 2 فوجی ہلاک اور شہری سمیت 3 زخمی ہوگئے تھے۔