شام معاملے پرتمام فریق یو این منشور کے خلاف اقدامات سے گریز کریں: پاکستان

پاکستان نے شام کے علاقے دوما میں کیمیاوی ہتھیاروں کے حملے کے تناظر میں تمام فریقوں پر زوردیاہے کہ وہ اقوام متحدہ کے منشور کیخلاف کسی قسم کے اقدام سے گریز کریں۔

ایک بیان میں دفترخارجہ کے ترجمان نے کہا ہے کہ پاکستان دنیا کے کسی بھی حصے میں کسی بھی ملک کی طرف سے کیمیائی ہتھیاروں کے استعمال کی مذمت کرتا ہے۔

بیان میں کہا گیا کہ کیمیائی ہتھیاروں کے استعمال کے بارے میں حقائق کیمیائی ہتھیاروں کی روک تھام کیلئے کام کرنیوالے ادارے کی تحقیقات کے ذریعے سامنے لانا انتہائی ضروری ہے۔

دفترخارجہ نے کہا کہ ہمیں شام کی عوام سے گہری ہمدردی ہے جنہیں ملک میں موجودہ کشیدہ صورتحال میں مشکلات کا سامنا ہے اورہمیں امید ہے کہ تمام متعلقہ فریق شام کے عوام کی مصائب کے خاتمے کیلئے اس مسئلے کا فوری حل تلاش کریں گے۔