.

سعودی امدادی پیکج کے اعلان سے ڈالر سستا ہوگیا، روپے کی قدر میں اضافہ

پہلی اشاعت: آخری اپ ڈیٹ:

سعودی عرب کی جانب سے پاکستان کے لیے 4 ارب 20 کروڑ ڈالر کے امدادی پیکج کے اعلان کے بعد انٹربینک مارکیٹ میں ڈالر کے مقابلے میں روپے کی قدر 2 روپے 27 پیسے مستحکم ہوئی ہے۔

تاجروں اور بینکرز کے مطابق سعودی پیکج سے ملک کے غیر ملکی ذخائر میں اضافہ ہوگا جو حالیہ چند ماہ سے گراوٹ کا شکار ہے۔

گزشتہ روز انٹر بینک مارکیٹ میں ڈالر ریکارڈ 175.27 روپے پر تھا، مئی سے لے کر اب تک مقامی کرنسی کی قدر تقریباً 13.6 فیصد تک کم ہوچکی ہے۔

سعودی پیکج کے بعد دن کے درمیانی حصے میں انٹر بینک مارکیٹ میں ڈالر 173 روپے ریکارڈ کیا گیا۔

پاکستان ایک ارب ڈالر کی قسط کے حصول کے لیے گزشتہ دو ہفتوں سے بین الاقوامی مالیاتی فنڈ سے بات چیت کر رہا ہے لیکن اس کا چھٹا جائزہ غیر نتیجہ خیز رہا۔

ایک سرکاری اہلکار نے بتایا کہ سعودی حکومت فوری طور پر ایک سال کے لیے پاکستان کے اکاؤنٹ میں 3 ارب ڈالر جمع کرے گی اور اسے کم از کم اکتوبر 2023 میں آئی ایم ایف پروگرام کی تکمیل تک برقرار رکھے گی۔