پاکستان جنگ زدہ سوڈان سے اپنے شہریوں کے انخلا میں تعاون پر سعودی عرب کا ممنون

سوڈان سے پاکستانی شہریوں کے انخلا کا عمل جاری ہے اور ایک بحری جہاز 37 پاکستانی شہریوں کو پورٹ سوڈان سے لے کرجدہ پہنچ گیا ہے۔

پاکستان کے دفتر خارجہ نےٹویٹر پر جاری کردہ بیان میں کہا ہے کہ ان پاکستانی شہریوں کا جدہ میں تعینات پاکستانی قونصل جنرل خالد مجید نے استقبال کیا۔

پاکستان نے کہا ہے کہ وہ سوڈان سے اپنے شہریوں کے انخلا اور اس میں تعاون اور مہمان نوازی پر سعودی حکومت کا شکرگزار ہے۔

اس سے قبل فوج کے درمیان لڑائی کے شکار افریقی ملک سوڈان سے غیر ملکی شہریوں کو لے کر ایک سعودی بحری جہاز بدھ کی صبح جدہ پہنچا تھا جس پر سعودی وزارت خارجہ کے مطابق پاکستانیوں سمیت 1674 افراد سوار تھے۔

سعودی خبر رساں ادارے ایس پی اے نے کہا ہے کہ اب تک سعودی عرب پاکستان سمیت 62 ممالک کے 2148 شہریوں کو سوڈان سے نکال چکا ہے جس میں 114 سعودی شہری بھی شامل ہیں۔

خبر رساں ادارے کے مطابق سعودی عرب غیر ملکی شہریوں کو ان کے ممالک بھیجنے کے لیے تمام ضروری سہولیات کا انتظام بھی کر رہا ہے۔