پاکستان کی غزہ، لبنان اور شام کے لیے امداد: سامان کی 21ویں کھیپ دمشق پہنچ گئی
کمبل، خوراک اور ادویات پر مشتمل 17 ٹن امدادی اشیاء بھیجی گئیں
پاکستان کی جانب سے لبنان، غزہ اور شام میں جنگ سے متأثرہ افراد کے لیے امدادی سامان کی 21ویں کھیپ جمعرات کو دمشق پہنچ گئی۔ یہ بات نیشنل ڈیزاسٹر مینجمنٹ اتھارٹی (این ڈی ایم اے) نے بتائی۔
پاکستان نے یہ کھیپ بدھ کو مشرقی شہر راولپنڈی سے دمشق کے لیے روانہ کی۔ پاک فضائیہ کی مدد سے ارسال کردہ 17 ٹن امدادی سامان کمبل، خوراک اور ادویات شامل تھیں۔
اتھارٹی نے ایک بیان میں کہا، "فلسطین غزہ اور لبنان کے جنگ سے متأثرہ/بے گھر لوگوں کے لیے انسانی امداد کی 21ویں کھیپ کامیابی کے ساتھ دمشق پہنچ گئی ہے جو حکومتِ پاکستان/این ڈی ایم اے کی طرف سے کل نور خان بیس سے ایک چارٹرڈ طیارے کے ذریعے بھیجی گئی۔"
بیان میں کہا گیا کہ یہ کھیپ دمشق میں پاکستان کے سفیر ایئر مارشل (ریٹائرڈ) شاہد اختر نے وصول کی۔
این ڈی ایم اے نے کہا، "حکومت پاکستان فلسطین (غزہ) اور لبنان کے جنگ سے متأثرہ لوگوں کو انسانی امداد فراہم کرنے کے اپنے عزم پر ثابت قدم ہے۔"
غزہ میں اسرائیل کی جنگ شروع ہونے کے بعد سے پاکستان نے یہ مسئلہ اقوامِ متحدہ، اسلامی تعاون تنظیم اور دیگر کثیر الجہتی پلیٹ فارمز پر بارہا اٹھایا ہے اور بین الاقوامی طاقتوں اور اداروں سے غزہ میں اسرائیلی فوجی کارروائیوں کو روکنے کا مطالبہ کیا ہے۔
