دبئی :ڈرائیونگ کے دوران میک اپ اور کنگھی پر جرمانہ

میک اپ اور کنگھی پرمردو خواتین کی گاڑیاں ایک ماہ کے لیے ضبط ہوں گی

پہلی اشاعت: آخری اپ ڈیٹ:
مطالعہ موڈ چلائیں
100% Font Size
دو منٹ read

متحدہ عرب امارات کی وزارتِ داخلہ نے دبئی میں ڈرائیونگ کے دوران میک اپ کرنے اور بال سنوارنے والی خواتین اور مرد حضرات کے لیے 272 ڈالرز جرمانے کی سزا مقرر کی ہے۔

وزارتِ داخلہ نے پولیس کے لیے ایک سرکلر جاری کیا ہے جس میں کہا ہے کہ ''ڈرائیونگ کے دوران بال سنوارنے اور چہرے کا بناؤ سنگھار کرنے کے عمل کو بھی خطرناک انداز میں گاڑی چلانے ایسا جرم سمجھا جائے''۔

ایک اخباری رپورٹ کے مطابق موٹر کار چلانے والی کوئی بھی خاتون اگر میک اپ کرتے ہوئے پکڑی گئی تو اس پر مذکورہ جرمانہ عاید کیا جائے گا،ایک ماہ کے لیے اس کی گاڑی ضبط کر لی جائے گی اور اس کے لائسنس پر بارہ سیاہ نقاط لگا دیے جائیں گے۔

دبئی پولیس کی جانب سے جاری کردہ ایک بیان میں کہا گیا ہے کہ ڈرائیونگ کے دوران اپنے بالوں کو کنگھی کرنے اور مخصوص عربی پگڑی درست کرنے والے مرد حضرات کو بھی اس جرمانے اور سزا کا سامنا کرنا پڑے گا۔

دبئی پولیس کے عمومی محکمہ برائے ٹریفک کے ڈپٹی ڈائریکٹر کرنل سیف مہیرالمرزوئی نے کہا ہے کہ ڈرائیوروں کی اس طرح کی خلاف ورزیاں وفاقی ٹریفک قانون کے زمرے میں آتی ہیں۔البتہ ٹریفک اشاروں پر موبائل فون کا استعمال کرتے ہوئے پکڑے جانے والے ڈرائیوروں کو اس سے کم تر جرمانہ کیا جاتا ہے اور انھیں چار سیاہ نقاط کے مطابق جرمانہ کیا جائے گا۔

انھوں نے اس کی وضاحت کرتے ہوئے کہا کہ ''بعض ڈرائیور حضرات اس شق کو غلط طور پر سمجھے ہیں۔ان کا خیال ہے کہ اگر وہ ٹریفک اشارے پر رُکے ہوئے موبائل فون استعمال کررہے ہوں تو وہ اس شق کی خلاف ورزی کے مرتکب نہیں ہوتے کیونکہ ان کی گاڑی چل نہیں رہی ہوتی ہے بلکہ وہ رکی ہوتی ہے لیکن اگر کوئی ڈرائیور موبائل فون استعمال کررہا ہو تو اس کی مکمل توجہ گاڑی چلانے پر مرکوز نہیں ہوتی ہے اور وہ ٹریفک میں خلل ڈالنے یا کسی حادثے کا سبب بن سکتا ہے''۔

واضح رہے کہ دبئی ٹریفک پولیس نے اس سال اب تک ڈرائیونگ کے دوران موبائل فون استعمال کرنے والے افراد کے خلاف 26533 کیس درج کیے ہیں۔

مقبول خبریں اہم خبریں

مقبول خبریں