ازبکستان کے سنٹر فار اسلامک سویلائزشن کے صدر فردوس عبدوخالیکوو کے زیر قیادت ایک اعلیٰ سطح کے وفد نے رابطہ عالم اسلامی کے سربراہ ڈاکٹر محمد بن عبدالکریم العیسیٰ سے ملاقات کی ہے اور دو طرفہ دلچسپی کے امور پر تبادلہ خیال کیا ہے۔
اس موقع پر ڈاکٹر محمد بن عبدالکریم العیسیٰ نے اسلامی تہذیب و ثقافت کے فروغ کے لیے رابطہ عالم اسلامی کے کردار کو اجاگر کیا کہ یہ ادارہ کس طرح اسلامی تمدن و ثقافت کے خلاف پھیلائے گئے پروپیگنڈے اور منفی باتوں کا ازالہ کر رہا ہے۔
ان کا کہنا تھا یہ ساری کی ساری منفی باتیں اور غلط فہمیاں پھیلانے کا انداز اب ایک روایتی طریقہ بن چکا ہے۔ یہ بات سعودی خبر رساں ادارے 'ایس پی اے' نے پیر کے روز رپورٹ کی ہے۔
ازبکستان کے سنٹر فار اسلامک سویلائزشن کے صدر نے کہا ہمارے لیے یہ اظہار کرنا قابل فخر ہے کہ رابطہ عالم اسلامی کی بین الاقوامی سطح پر کوششیں جاری ہیں۔ انہوں نے ڈاکٹر العیسیٰ کی تعریف کی اور کہا اقوام متحدہ میں ڈاکٹر عیسیٰ کی تقریر مسلمانوں کے لیے بڑے حوصلے اور فخر کی بات ہے کہ ڈاکٹر عیسیٰ نے اسلاموفوبیا کے شکار مسلمانوں کے حق میں بات کی اور لوگوں کو اسلام دشمنی کے ہتکھنڈے اسلامفوبیا کے نقصانات سے آگاہ کیا۔
دریں اثناء مکہ میں عراقی قونصل جنرل محمد سمیر علی نقشبندی نے ڈاکٹر عیسیٰ سے ملاقات کی۔ ان کی یہ ملاقات ان کے قونصل جنرل کی مدت کے خاتمے پر ہوئی۔
