ٹیٹو بنانے سے جلد کے کینسر کا خطرہ 29 فیصد بڑھ جاتا ہے
ایک حالیہ سائنسی مطالعہ سے یہ نتیجہ اخذ کیا گیا ہے کہ ٹیٹو، جنہیں بہت سے لوگ شوق سے جسم کے مختلف حصوں پر بنواتے ہیں، انسان کو ایک سنگین خطرے سے دوچار کرتے ہیں کیونکہ وہ جلد کے کینسر کے خطرات کو 29 فیصد تک بڑھا دیتے ہیں۔ سائنس کی ماہر ویب سائٹ "سائنس الرٹ" کی طرف سے شائع کردہ ایک رپورٹ کا جائزہ "العربیہ ڈاٹ نیٹ" نے لیا۔ رپورٹ میں بتایا گیا ہے کہ سائنس دانوں نے پایا ہے کہ ٹیٹو والے افراد کو جلد کے کینسر (میلانوما) کے بڑھتے ہوئے خطرے کا سامنا ہوتا ہے۔ یہ کینسر کی ایک خطرناک شکل ہے جو اکثر بالائے بنفشی شعاعوں کے سامنے آنے سے منسلک ہے۔
تاہم ٹیٹو سے جلد کے خلیے کی سطح کے کینسر (سکواومس سیل کارسینوما) کا خطرہ بڑھتا ہوا نظر نہیں آتا جو جلد کے کینسر کی ایک اور قسم ہے اور بالائے بنفشی شعاعوں کے نقصان سے منسلک ہے۔ اگرچہ کینسر کی یہ دونوں اقسام ایک ہی وجہ سے ہوتی ہیں لیکن ہر ایک مختلف قسم کے خلیوں سے پیدا ہوتی ہے اور ان کی شدت مختلف ہوتی ہے۔ میلانوما جلد کے خلیے کی سطح کے کینسر سے کہیں زیادہ خطرناک ہے۔
یہ نتائج بہت سے مغربی نوجوانوں کے لیے ایک صدمے کا سبب بن رہے ہیں جو ٹیٹو کو خود اظہار خیال کا ایک طاقتور ذریعہ اور شناخت کا سنگ بنیاد سمجھتے ہیں۔ صرف سویڈن میں مثال کے طور پر تقریباً ہر تین بالغوں میں سے ایک ٹیٹو بنواتا ہے۔ دونوں میلانوما اور سکواومس سیل کارسینوما آہستہ آہستہ بڑھتے ہیں اور یہ نسبتاً نایاب ہیں۔ جس کی وجہ سے ان پر طویل مدتی تحقیق کرنا مشکل ہو جاتا ہے۔ سائنس دانوں کے مطابق ٹیٹو والے اور بغیر ٹیٹو والے افراد کے بڑے گروہوں کو کئی سالوں تک فالو کرنا مہنگا اور وقت طلب ہوگا۔
سویڈن میں یہ نیا مطالعہ کرنے والی تحقیقی ٹیم نے کہا کہ انہوں نے ایسے لوگوں کی نگرانی کی جن میں پہلے کینسر کی تشخیص ہوئی تھی اور پھر یہ جاننے کے لیے پیچھے کی طرف دیکھا کہ کس نے ماضی میں ٹیٹو بنوایا تھا تاکہ نتائج اخذ کیے جا سکیں۔
سویڈن صحت اور آبادی کے اعداد و شمار کے بارے میں معلومات ریکارڈ کرنے والے اعلیٰ معیار کے قومی ریکارڈ کو برقرار رکھتا ہے۔ قومی کینسر رجسٹر سے محققین نے 20 اور 60 سال کی عمر کے تمام لوگوں کی شناخت کی جن میں 2017 میں میلانوما یا 2014 اور 2017 کے درمیان سکواومس سیل کارسینوما کی تشخیص ہوئی تھی۔ پھر ان کا مطالعہ کیا گیا اور یہ نتائج اخذ کیے گئے۔
ٹیٹو والے افراد میں ٹیٹو کے بغیر والوں کے مقابلے میں میلانوما ہونے کا خطرہ 29 فیصد زیادہ تھا۔ سائنس دانوں نے یہ بھی پایا کہ جن کے پاس دس سال سے زیادہ عرصے سے ٹیٹو تھے ان میں خطرے میں اضافہ زیادہ تھا۔
سکواومس سیل کارسینوما کے لیے ٹیٹو نے کوئی فرق نہیں ڈالا۔ نتائج تمام تجزیوں میں مستقل تھے جو جلد کے کینسر کی اس قسم سے ٹیٹو کے کوئی تعلق نہ ہونے کی نشاندہی کرتے ہیں۔
محققین کو اس بات کا بھی کوئی ثبوت نہیں ملا کہ بڑا ٹیٹو خطرے کو بڑھاتا ہے اور یہ غیر متوقع تھا کیونکہ بڑے ٹیٹو میں زیادہ سیاہی ہوتی ہے اور اس لیے زیادہ نقصان دہ مواد ہوتا ہے۔ تاہم ایک ممکنہ وضاحت یہ ہے کہ ٹیٹو کی سیاہی جلد میں محصور نہیں رہتی کیونکہ جسم کا مدافعتی نظام اسے بیرونی مادے کے طور پر سمجھتا ہے اور سیاہی کے کچھ ذرات کو لمف نوڈز میں منتقل کردیتا ہے۔ ایک سابق امریکی مطالعہ نے بتایا تھا کہ بڑا ٹیٹو میلانوما کے خطرے کو کم کر سکتا ہے لیکن محققین کا کہنا ہے کہ اس مطالعہ میں جلد کی قسم یا بالائے بنفشی شعاعوں کے سامنے آنے جیسے اہم عوامل کو مدنظر نہیں رکھا گیا تھا۔
