جارج، امل کلونی کی جرمن چانسلر سے ملاقات

امریکی اداکار جارج کلونی اور انسانی حقوق کے لئے سرگرم رہنے والی ان کی اہلیہ امل کلونی نے جرمنی کی چانسلر انجیلا مرکل سے ایک نجی نوعیت کی ملاقات کی ہے، جس میں شام میں جاری بحران اور یورپ کی جانب سے پناہ گزین کی مدد کی کوششوں پر بات چیت کی گئی۔

امریکی اداکار جو کہ برلن فلم فیسٹیول میں شرکت کے سلسلے میں جرمنی آئے ہوئے ہیں، نے سابق برطانوی وزیر خارجہ اور بین الاقوامی ریسکیو کمیٹی کے موجودہ سربراہ ڈیوڈ ملی بینڈ کے ہمراہ جرمن چانسلر سے 40 منٹ تک ملاقات کی۔

ڈیوڈ ملی بینڈ نے ملاقات کے بعد بتایا کہ" ہم نے تمام اقوام عالم کی جانب سے اس عالمی مسئلے کے حل میں مدد پر بات چیت کی۔" ان کا کہنا تھا کہ پناہ گزین کا مسئلہ صرف شام یا جرمنی کا مسئلہ نہیں ہے۔

انہوں نے مرکل کی جانب سے پناہ گزین کے مسئلے پر مضبوط قیادت اور مثالی کردار رکھنے پر ان کی تعریف کی اور کہا کہ یہ نہ صرف یورپ بلکہ پوری دنیا کے لئے مثال ہے۔