ترکی : 120 شامی پناہ گزینوں کی یونان پہنچنے کی کوشش ناکام

ترکی میں حکام نے 120 شامی پناہ گزینوں کو یونان میں بحیرہ ایجیئن کے ساحل پر پہنچانے والے دو اسمگلروں کو گرفتار کرلیا۔

عینی شاہدین نے ایک خبر رساں ایجنسی کو بتایا کہ پولیس نے پناہ گزینوں کے اس گروپ کو جس میں زیادہ تر خواتین اور بچے تھے.. حراست میں لے کر یونانی جزیرے لزبوس کے مقابل ایک ساحل پر پہنچا دیا جس کے بعد وہاں سے انہیں بس کے ذریعے ترکی کے ساحلی شہر ازمیر منتقل کردیا گیا۔

اس دوران ایک اسمگلر فرار ہونے میں کامیاب ہوگیا جب کہ افسران نے چھ چھوٹی وینوں کو قبضے میں لے لیا جن کو اسمگلر ساحل تک لے کر آئے تھے۔

ایک دوسری پیش رفت میں میڈیا نے بتایا ہے کہ ترکی نے شام کی سرحد پر کھلی آخری گزرگاہ کو انسانی امداد کے قافلوں اور کوچ کے خواہش مند شامیوں کے سوا ہر قسم کی آمدورفت کے لیے بند کردیا ہے۔

"سی اِین اِین ترکی" پر نشر ہونے والی رپورٹ میں ترکی کے جنوبی علاقے ہتای میں واقع گزرگاہ جيلفيجوزو کی بندش کے فیصلے کی وجہ نہیں بتائی گئی۔