.

شنگھائی میں وین ہجوم پر چڑھ گئی، 18 زخمی

پہلی اشاعت: آخری اپ ڈیٹ:

چین کے سرکاری میڈیا کا کہنا ہے کہ شنگھائی شہر میں ایک وین پیدل چلنے والوں کی بھیڑ سے ٹکرا گئی اور اس واقعے میں 18 افراد زخمی ہوگئے ہیں۔

یہ واقعہ ایک کیفے سٹار بکس کے باہر پیش آتا ہے۔ حکام کا کہنا ہے کہ زخمی ہونے والوں میں سے تین کی حالت تشویش ناک ہے۔

اس واقعے کی وجہ ابھی زیرِ تفتیش ہے اور یہ واضح نہیں کہ وین کے ذرائیور نے ایسا جان بوجھ کر کیا یا پھر یہ ایک حادثہ تھا۔

سوشل میڈیا پر سامنے آنے والی تصاویر میں وسطی شنگھائی کے علاقے پیپلز سکوئر میں ایک وین کو جلتے ہوئے دیکھا جا سکتا ہے۔

کچھ عینی شاہدین نے مقامی میڈیا سے بات کرتے ہوئے بتایا کہ وین کے اندر گیس کے کنستر موجود تھے۔ ایک مقامی اخبار کا کہنا ہے کہ آگ اب بجھ چکی ہے۔

پیپلز سکوئر شنگائی کی انتہائی مصروف ناجنگ سٹریٹ پر واقعہ ہے اور یہاں شہر کے اندر چلنے والی ٹرینوں کا اہم انٹرچینج ہے۔ یہ واقعہ مقامی وقت کے مطابق صبح نو بجے پیش آیا جب اس علاقے میں بہت زیادہ بھیڑ ہوتی ہے۔