یمنی حوثیوں کا الحدیدہ کی بندرگاہ سے مغرب میں سعودی آئیل ٹینکر پر حملہ

پہلی اشاعت: آخری اپ ڈیٹ:
مطالعہ موڈ چلائیں
100% Font Size
3 منٹس read

سعودی عرب کی قیادت میں عرب اتحاد کے ترجمان کرنل ترکی المالکی نے اطلاع دی ہے کہ یمن کی بندرگاہ الحدیدہ کے نزدیک ایران کے حمایت یافتہ حوثی شیعہ باغیوں نے منگل کی دوپہر سعودی عرب کے تیل کے ایک ٹینکر پر حملہ کیا ہے۔

ترجمان نے بتایا ہے کہ مقامی وقت کے مطابق دوپہر ٹھیک ڈیڑھ بجے الحدیدہ کی بندرگاہ کے مغرب میں بین الاقوامی پانیوں میں سعودی عرب کے آئیل ٹینکر کو حملے میں نشانہ بنایا ہےلیکن عرب اتحاد کے ایک بحری جہاز نے اس حملے کو ناکام بنا دیا ہے۔

ترجمان کے مطابق اس حملے میں سعودی آئیل ٹینکر کو معمولی نقصان پہنچا ہے ۔اس کے بعد اس نے عرب اتحاد کے بحری جہاز کی معیت میں شمال کی جانب اپنا سفر جاری رکھا ہے۔

کرنل ترکی المالکی کا کہنا تھا کہ اس حملے سے بحیرۂ احمر اور آبنائے باب المنداب میں جہاز رانی اور بین الاقوامی تجارت کے لیے خطرات پیدا ہوگئے ہیں اور مسلسل ایسے حملوں سے ان ملیشیاؤں اور ان کے پشتیبان ممالک سے علاقائی اور بین الاقوامی سلامتی کو لاحق خطرات کی بھی عکاسی ہوتی ہے۔

انھوں نے یہ بات زور دے کر کہی کہ حدیدہ کی بندرگاہ ابھی حوثی ملیشیا کے کنٹرول میں ہے اور اس کو بحری جہازوں پر حملوں اور میزائل اور دوسرے ہتھیاروں کی اسمگلنگ کے لیے استعمال کیا جارہا ہے۔

ان کا کہنا تھا کہ مشترکہ اتحادی فورسز کی قیادت ایسے خطرات سے نمٹنے اور یمن کے علاوہ علاقے کی سلامتی اور استحکام کو برقرار رکھنے کے لیے تمام ضروری اقدامات کررہی ہے۔ اس کے علاوہ وہ آبنائے باب المنداب اور بحیرہ ٔاحمر میں بین الاقوامی جہاز رانی اور تجارتی بحری جہازوں کی آزادانہ آمد ورفت کو یقینی بنانے کے لیے بھی اقدامات کررہی ہے۔

مقبول خبریں اہم خبریں

مقبول خبریں