سعودی عرب کے حوالے سے متشدد بن کر عالمی معیشت تباہ نہیں کروں گا : ٹرمپ

امریکی صدر ڈونلڈ ٹرمپ کا کہنا ہے کہ وہ مملکت سعودی عرب کے حوالے سے سخت گیر موقف اپنا کر عالمی معیشت کو سبوتاژ ہر گز نہیں کریں گے۔

منگل کے روز اپنے ایک بیان میں امریکی صدر کا کہنا تھا کہ CIA سعودی صحافی جمال خاشقجی کے قتل کے حوالے سے 100% یقینی نتیجے تک نہیں پہنچی ہے۔

ٹرمپ نے مزید کہا کہ اگر سعودی ولی عہد ارجنٹائن میں G-20 کے سربراہ اجلاس میں آئے تو وہ شہزادہ محمد بن سلمان سے ملاقات کریں گے۔ ٹرمپ کے مطابق سعودی عرب نے تیل کی قیمتیں برقرار رکھنے کے سلسلے میں امریکا کی مدد کی۔

اس سے قبل منگل کے ہی روز ٹرمپ نے باور کرایا تھا کہ امریکا ،،، سعودی عرب کا ایک مضبوط شراکت دار رہنا چاہتا ہے۔ انہوں نے اپنے بیان میں کہا کہ امریکی انٹیلی جنس ادارے خاشقجی کے قتل کے حوالے سے معلومات کا جائزہ لے رہے ہیں۔