متحدہ عرب امارات میں حکام نے منگل کے روز کرونا وائرس کے چھے نئے کیسوں کی اطلاع دی ہے جبکہ وزارت تعلیم نے اس مہلک وائرس سے درپیش خطرے کے پیش نظر آیندہ اتوار سے ملک بھر میں ایک ماہ کے لیے تمام اسکول بند کرنے کا فیصلہ کیا ہے۔
یو اے ای کی وزارت صحت نے ایک بیان میں کہا ہے کہ کرونا وائرس کا شکار ہونے والے چھے نئے افراد میں دو کا تعلق روس ، دو کا اٹلی ، ایک کا جرمنی اور ایک کا کولمبیا سے ہے۔ان کے بعد ملک میں کرونا وائرس کے تصدیق شدہ کیسوں کی تعداد ستائیس ہوگئی ہے۔
یو اے ای نے سوموار کو ایران میں موجود اپنے شہریوں کو خصوصی پروازوں کے ذریعے نکال لیا تھا۔ ان کا انخلا کرونا وائرس کو پھیلنےسے روکنے کی کوششوں کے ضمن میں کیا گیا تھا۔واضح رہے کہ یو اے ای میں چین اور ایران سے آنے والے بعض افراد کے کرونا وائرس کے ٹیسٹ مثبت آئے ہیں۔
دریں اثناء متحدہ عرب امارات کی وزارت تعلیم نے آیندہ اتوار سے ملک بھر میں تمام اسکولوں کو ایک ماہ کے لیے بند کرنے کا اعلان کیا ہے۔اس نے ایک بیان میں کہا ہے کہ اسکولوں میں موسم بہار کی چھٹیوں کا اب 15 مارچ کے بجائے 8 مارچ سے آغاز ہوگا اور یہ دو ہفتے تک جاری رہیں گی۔
اس کے بعد مزید دوہفتے تک اسکول بند رہیں گے مگر طلبہ و طالبات کی فاصلاتی نظام کے تحت تدریسی سرگرمیاں بحال کردی جائیں گی۔ان چھٹیوں کا 22 مارچ سے آغاز ہوگا اور یہ پانچ اپریل تک جاری رہیں گی۔فاصلاتی تدریس کا بدھ کو بعض منتخب سرکاری اسکولوں میں آزمائشی بنیاد پر تجربہ کیا جائے گا۔
واضح رہے کہ وزارت تعلیم نے کرونا وائرس سے بچاؤ کے لیے حفظ ماتقدم کے طور پر گذشتہ ہفتے تمام اسکولوں میں غیر نصابی سرگرمیاں تاحکم ثانی معطل کردی تھیں۔ وزارت نے گذشتہ ہفتے کے روز ایک بیان میں کہا تھا کہ اتوار سے تمام اسکولوں کے تعلیی دوروں اور سیر پر پابندی عاید کی جارہی ہے اور تمام نرسریاں بھی تاحکم ثانی بند رہیں گی۔
