مارٹینا اسٹرانگ 2021 کے بعد متحدہ عرب امارات میں امریکا کی پہلی باضابطہ سفیر مقرر

پہلی اشاعت: آخری اپ ڈیٹ:
مطالعہ موڈ چلائیں
100% Font Size
دو منٹ read

امریکی محکمہ خارجہ نے مارٹینا اسٹرانگ کو متحدہ عرب امارات میں بہ طور سفیر مقرر کرنے کا اعلان کیا ہے۔وہ عہدے کا حلف اٹھانے پر اب 2021 کے بعد متحدہ عرب امارات میں امریکا کی پہلی باضابطہ سفیر ہوں گی۔

صدر جو بائیڈن نے قریباً ایک سال قبل مارٹینا اسٹرانگ کا بہ طور سفیرتقرر کیا تھا۔محکمہ خارجہ میں ان کی حلف برداری کے موقع پر قائم مقام نائب وزیرخارجہ ٹوری نولینڈ، مشرق قریب کے امور کی معاون وزیرخارجہ باربرا لیف اور دیگر حکام موجود تھے۔

اس موقع پر اسٹرانگ نے کہا کہ ’’ہمارے درمیان مضبوط تعاون ہمارے ممالک کی بنیادی ترجیحات کی قریبی صف بندی کی عکاسی کرتا ہے اور یہ تعاون ہماری مشترکہ سلامتی اور خوش حالی کو تقویت دیتا ہے‘‘۔

اسٹرانگ ایک پیشہ ور سفارت کار ہیں اور سعودی عرب میں امریکی سفارت خانے کی عبوری ناظم الامور کی حیثیت سے خدمات انجام دے چکی ہیں۔وہ جان راکولٹا کی جگہ لیں گی، جنھیں سابق صدر ڈونلڈ ٹرمپ نے مقرر کیا تھا۔

اس سے قبل وہ بلغاریہ، عراق، جمہوریہ چیک اور بارباڈوس میں امریکی سفارت خانوں میں خدمات انجام دے چکی ہیں اور عربی، چیک، پولش، فرانسیسی، جرمن، روسی اور بوسنیائی زبانیں روانی سے بولتی ہیں۔

نائب وزیرخارجہ ٹوری نولینڈ نے ایکس پر ایک پوسٹ میں کہا:’’کمیونسٹ چیکوسلواکیہ میں اپنے بچپن سے لے کر فورٹ ورتھ، ٹیکساس میں 14 سال کی عمر میں ایک نئی زندگی اور پھر سفیر کے طور پر ہمارے ملک کی نمائندگی کرنے تک، مارٹینا امریکی خواب کی علامت ہیں اور متحدہ عرب امارات میں شاندار کام کریں گی‘‘۔

مقبول خبریں اہم خبریں

مقبول خبریں