امریکی وزیرِ خارجہ اینٹونی بلنکن نے بدھ کے روز کہا ہے کہ امریکہ غزہ میں لڑائی میں حقیقی اور طویل وقفہ چاہتا ہے تاکہ ان لوگوں تک امداد پہنچ سکے جنہیں اس کی ضرورت ہے لیکن لوگوں کی مدد کرنے کا بہترین طریقہ جنگ کا خاتمہ ہے۔
بلنکن نے برسلز کے دورے کے دوران نامہ نگاروں کو بتایا، "اسرائیل نے اپنے لیے خود مقرر کردہ معیارات کے مطابق اپنے اہداف پورے کر لیے ہیں۔ اب یہ جنگ ختم کرنے کا وقت ہونا چاہئے۔"
غزہ میں انسانی صورتِ حال کو بہتر بنانے کے لیے اقدامات کرنے کی غرض سے اسرائیل کو دی گئی 30 دن کی امریکی ڈیڈ لائن کی میعاد منگل کے روز ختم ہو گئی جس کے بعد واشنگٹن نے کہا، اسرائیل غزہ کے لیے امداد نہیں روک رہا اور اس لیے وہ امریکی قانون کی خلاف ورزی نہیں کر رہا۔
آٹھ بین الاقوامی امدادی گروپوں نے کہا کہ اسرائیل امداد تک رسائی کو بہتر بنانے کے امریکی مطالبات کو پورا کرنے میں ناکام رہا۔ غذائی تحفظ کے ماہرین نے غزہ کے بعض حصوں میں قحط آنے کا امکان ظاہر کیا ہے۔
بائیڈن جن کی صدارت کی میعاد جنوری میں ختم ہو رہی ہے، نے سات اکتوبر کے بعد سے اسرائیل کی بھرپور حمایت کی ہے۔
تب سے اب تک غزہ میں 43,500 سے زائد فلسطینی جن میں زیادہ تر عام شہری ہیں، ہلاک ہو چکے ہیں اور غزہ کا بڑا حصہ منہدم ہو گیا ہے۔
اسرائیل کے کٹر حامی ٹرمپ نے وزیرِ اعظم بنجمن نیتن یاہو کے حماس کو تباہ کرنے کے ہدف کی بھرپور حمایت کی ہے۔ انہوں نے شرقِ اوسط میں قیامِ امن کا وعدہ تو کیا ہے لیکن یہ نہیں بتایا کہ وہ اسے کیسے پورا کریں گے۔
