ترکیہ کے وزیرِ تجارت نے بدھ کے روز کہا ہے کہ امیرِ قطر شیخ تمیم بن حمد آلِ ثانی جمعرات کو اعلیٰ سطحی ملاقاتوں کے لیے ترکی کا دورہ کریں گے۔ دوحہ کی جانب سے غزہ کی ثالثی سے دستبرداری کے بعد ترک وزیر کا یہ بیان سامنے آیا ہے۔
بعض تجزیہ کاروں کا خیال ہے کہ اسرائیل کے ساتھ کشیدہ تعلقات کے باوجود ترکی ثالثی میں کچھ کردار ادا کر سکتا ہے کیونکہ وہ فلسطینی مزاحمتی گروپ حماس کو دہشت گرد نہیں سمجھتا اور گروپ کے بعض سیاسی عہدیدار باقاعدگی سے ترکی کا دورہ کرتے ہیں۔
گذشتہ ہفتے قطر نے کہا تھا کہ جب تک حماس اور اسرائیل مذاکرات کے لیے آمادگی اور سنجیدگی کا مظاہرہ نہیں کرتے، وہ غزہ میں جنگ بندی اور یرغمالیوں کی رہائی کے معاہدے میں ثالثی کی کوششوں کو روک دے گا۔
ترک وزیرِ تجارت عمر بولات نے نشریاتی ادارے ٹی وی 100 کو دو طرفہ تجارت پر مرکوز تبصروں میں بتایا، "امیرِ قطر بہرحال کل (جمعرات) انقرہ میں ہوں گے۔ ان کے ساتھ اہم مذاکرات اور اعلیٰ سطحی تزویری کونسل کا اجلاس منعقد ہو گا۔"
بولات نے اپنے تبصروں میں قطر یا حماس کے فیصلے کا ذکر نہیں کیا۔
انہوں نے مزید کہا، "ہم قطر کے ساتھ ایک جامع تجارتی معاہدے کے کسی بھی وقت نافذ ہونے کا انتظار کر رہے ہیں۔"
