وائٹ ہاؤس نے ہفتے کے روز عمان میں ایران کے ساتھ ہونے والی بات چیت کو آگے بڑھنے والا ایک قدم قرار دے دیا۔ وائٹ ہاؤس نے ایک بیان میں کہا امریکی خصوصی ایلچی سٹیو وٹکوف نے مسقط میں ایرانی وزیر خارجہ عباس عراقچی سے ملاقات کی اور ان کے ساتھ انتہائی مثبت اور تعمیری بات چیت کی ہے۔ وائٹ ہاؤس نے کہا خصوصی ایلچی وٹکوف نے عراقچی کو تصدیق کی ہے کہ انہیں صدر ٹرمپ کی طرف سے ہدایات موصول ہوئی ہیں کہ اگر ممکن ہو تو دونوں ممالک کے درمیان اختلافات کو بات چیت اور سفارت کاری کے ذریعے حل کیا جائے۔
بیان میں مزید کہا گیا کہ یہ مسائل انتہائی پیچیدہ ہیں۔ خصوصی ایلچی وٹکوف کی آج کی براہ راست مصروفیت باہمی طور پر فائدہ مند نتائج کے حصول کی طرف ایک قدم ہے۔ دونوں فریق اگلے ہفتے کو دوبارہ ملاقات کریں گے۔
تعمیری بات چیت
امریکی صدر ڈونلڈ ٹرمپ کے خصوصی ایلچی سٹیو وِٹکوف نے ’’ ایکس‘‘ پر لکھا کہ تصدیق کی کہ مذاکرات مثبت اور تعمیری انداز میں کیے گئے۔ ہم نے بہت مثبت اور تعمیری بات چیت کی۔ قبل ازیں ایرانی وزارت خارجہ نے ایک بیان میں کہا تھا کہ ایران اور امریکہ کے نمائندوں کے درمیان تہران کے ایٹمی پروگرام کے تصفیے کے حوالے سے مذاکرات تعمیری ماحول میں ہوئے۔
19 اپریل کو اگلا دور
ایرانی وزیر خارجہ عباس عراقچی نے اعلان کیا ہے کہ تہران اور واشنگٹن کے درمیان مذاکرات کا اگلا دوسرا دور اسی سطح پر 19 اپریل کو عمان میں منعقد ہوگا۔ یہ مذاکرات ایک ایسے وقت میں ہوئے ہیں جب بہت زیادہ دباؤ تھا۔ امریکہ نے دھمکی دی تھی کہ اگر وہ ناکام ہوگیا تو فوجی آپشن اختیار کرے گا۔ یہ پیش رفت غزہ کی پٹی اور لبنان میں اسرائیل کی طرف سے چھیڑی جانے والی دو جنگوں کے بعد ہوئی ہے۔ ان جنگوں نے تہران کے دو اہم اتحادیوں حماس اور حزب اللہ کو کمزور کر دیا ہے۔ ایرانی حمایت یافتہ حوثیوں کو بھی مسلسل امریکی حملوں کا سامنا ہے۔
