تاریخ : روس سے شکستوں کے بعد .... عثمانیوں نے رعائتوں والا معاہدہ قبول کر لیا
بر اعظم یورپ 1821 سے 1829 کے درمیان یونانی آزادی کی جنگ کے دوران، سنگین حالات سے گزر رہا تھا۔ اس جنگ کے دوران کئی یورپی طاقتوں نے عثمانیوں کے خلاف فوجی مداخلت کی۔ 6 جولائی 1827 کو لندن معاہدے کے دستخط کے بعد برطانیہ، فرانس اور روس نے یونانیوں کی حمایت میں عثمانیوں کے خلاف فوجی مداخلت کرنے پر اتفاق کیا۔ اس فوجی مداخلت کا مقصد عثمانیوں پر دباؤ ڈالنا تھا تاکہ وہ یونان کو ایک آزاد ریاست کے طور پر تسلیم کریں۔
یورپی مداخلت کی سب سے اہم شکل نیوارن کی سمندری لڑائی میں ظاہر ہوئی، جہاں یورپی اتحادیوں کی جنگی بیڑوں نے عثمانی بیڑے کے 55 جہاز تباہ کر دیے۔
اس حملے کے جواب میں، عثمانی سلطنت نے روس کے خلاف اقدامات کیے، جس سے روسی عثمانی جنگ (1828-1829) کا آغاز ہوا اور جنگی کارروائیاں مزید بڑھ گئیں۔
سال 1828 اور 1829 کے درمیان روسی عثمانی جنگ
نیوارن کی جنگ کے بعد، عثمانی سلطان محمود دوم نے روسیوں کے خلاف انتقامی اقدامات کا فیصلہ کیا۔ روسیوں پر اس جنگ میں شرکت کا الزام عائد کرنے کے بعد، محمود دوم نے پچھلے معاہدوں سے دست بردار ہو کر نومبر 1827 سے، روسی جہازوں کے لیے آبنائے باسفورس کو بند کرنے کا حکم دیا۔
اس کے بعد، اپریل 1828 میں روسی عثمانی جنگ شروع ہوئی جو ایک سال سے زیادہ جاری رہی اور ستمبر 1829 میں اختتام پذیر ہوئی۔
اس جنگ کے دوران عثمانیوں کو قوقاز اور بلقان میں ہونے والی جنگوں میں شدید نقصانات کا سامنا کرنا پڑا۔ رپورٹوں کے مطابق، ان جنگوں میں عثمانی افواج کے 80 ہزار سے زیادہ سپاہی ہلاک ہوئے۔ روسیوں نے ان جنگوں میں فتح حاصل کرتے ہوئے بلقان میں عثمانیوں سے مزید علاقے چھین لیے۔
اپنے ہلاک شدگان کی تعداد میں اضافے اور جنگی محاذ پر اپنی افواج کی پسپائی کے بعد، عثمانی سلطان محمود دوم نے امن کی طرف مائل ہوتے ہوئے روسیوں کی شرائط قبول کر کے جنگ کے خاتمے کے لیے مذاکرات شروع کیے۔
ادرنہ معاہدہ
عثمانیوں نے14 ستمبر 1829 کو ادرنہ میں روسیوں کے ساتھ وہ معاہدہ دستخط کیا جس کے ذریعے فریقین کے درماین جنگ کا خاتمہ ہوا۔ اس معاہدے کے مطابق، روسیوں کو بحر سیاہ سے متصل دریاؤں میں جہاز رانی کے حقوق حاصل ہوئے۔ مزید برآں، عثمانیوں نے دردانیال (آبنائے باسفورس کا جنوبی حصہ) کو تمام تجارتی جہازوں کے لیے کھولنے کا وعدہ کیا اور روس کی جورجیا اور یریوان پر حکمرانی کو تسلیم کیا۔
لندن معاہدہ 1827 کے مطابق، عثمانیوں نے یونان کی آزادی کو تسلیم کرنے یا ایک خود مختار یونانی ریاست کے قیام کی اجازت دی، بشرطیکہ وہ انتظامی طور پر سلطنت عثمانیہ کے زیر اثر رہیں۔
دوسری جانب، معاہدے نے عثمانیوں کو مولڈووا اور والاشیا کے علاقوں میں اپنی حکمرانی کو محدود کرنے پر مجبور کیا۔ اس کے علاوہ، عثمانیوں نے روسیوں کو قوقاز میں اپنے زیر تسلط علاقوں کو برقرار رکھنے کی اجازت دی اور ان روسی تاجروں کو مختلف تجارتی مراعات دینے پر اتفاق کیا جو عثمانی سرزمین پر مقیم تھے۔
