چین کے وزیرِ تجارت نے ملک کے دورے پر آئے ہوئے سعودی وزیر برائے سرمایہ کاری سے مذاکرات میں توانائی اور سرمائے کی نئی منڈیوں میں قریبی تعلقات پر زور دیا کیونکہ بیجنگ خلیجی تجارتی معاہدے کے لیے ریاض کی حمایت کا خواہاں ہے، چینی وزارتِ تجارت نے بدھ کے روز کہا۔
بیجنگ خلیجی ریاستوں کے ساتھ قریبی تجارتی تعلقات کی جستجو کر رہا ہے کیونکہ وہ امریکہ اور یورپی یونین کے ساتھ دو محاذوں پر جاری تجارتی جنگ سے نکلنے کے لیے کسی راستے کی تلاش میں ہے جنہوں نے کم قیمتوں اور اس خدشےکی بنا پر چینی اشیاء پر محصولات عائد کر دیئے ہیں کہ متعلقہ منڈیوں میں ان کا سیلاب آ جائے گا۔
منگل کو بیجنگ میں ہونے والی ملاقات میں چین کے وانگ وینتاؤ نے سعودی عرب کے خالد الفالح کے ساتھ تبادلۂ خیال کیا کہ چینی صدر شی جن پنگ کے پرچم بردار "بیلٹ اینڈ روڈ" کے بنیادی ڈھانچے کے اقدام کو سعودی "وژن 2030" سے ہم آہنگ کرنے کے کتنے امکانات ہیں۔
وانگ نے کہا کہ انہوں نے "دوطرفہ تجارتی حجم میں اضافے، دو طرفہ سرمایہ کاری تعاون کی سطح بلند کرنے اور نئی توانائی، صنعتی فراہمی اور سرمائے کی منڈیوں جیسے شعبوں میں وسیع تعاون" کے امکانات بھی دیکھے۔
چینی کسٹم کے اعداد و شمار کے مطابق چین نے گذشتہ سال سعودی عرب کو 50 بلین ڈالر سے زائد مالیت کا سامان فروخت کیا اور اس کی چوٹی کی برآمدات میں سمارٹ فونز، سولر پینلز اور سیلون کاریں شامل تھیں۔
