سعودی فرماں روا اور ولی عہد کی ہدایت پر شام کے لیے 16.5 لاکھ بیرل خام تیل کی امداد

خادم حرمین شریفین شاہ سلمان بن عبدالعزیز آل سعود اور ولی عہد و وزیراعظم شہزادہ محمد بن سلمان بن عبدالعزیز کی ہدایت پر سعودی عرب نے شام کو 16.5 لاکھ بیرل خام تیل کی امداد پیش کی ہے۔ یہ امداد سعودی ترقیاتی فنڈ کے ذریعے فراہم کی جائے گی۔
اس سلسلے میں جمعرات کو دونوں ملکوں کے درمیان ایک مفاہمتی یادداشت پر دستخط ہوئے۔ سعودی ترقیاتی فنڈ کے چیف ایگزیکٹو سلطان بن عبدالرحمن المرشد اور شام کے وزیرِ توانائی انجینئر محمد البشیر نے اس پر دستخط کیے۔ اس موقع پر شام میں سعودی سفیر ڈاکٹر فیصل المجفل اور وزارتِ توانائی کے عہدے دار انجینئر ماجد العتیبی بھی موجود تھے۔

یہ امداد شام کی ریفائنریوں کے آپریشن میں بہتری، اقتصادی استحکام اور معیشت کی بحالی میں مدد دے گی، تاکہ اہم شعبوں کی ترقی اور پائے دار ترقی کے عالمی اہداف حاصل کیے جا سکیں۔ سعودی خبر رساں ایجنسی "ایس پی اے" کے مطابق اس اقدام کا مقصد برادر شامی عوام کی زندگی بہتر بنانا اور دونوں ملکوں کے قریبی تعلقات کو مزید مستحکم کرنا ہے۔

سعودی فنڈ کے سربراہ سلطان المرشد نے "العربیہ" سے گفتگو میں کہا کہ شام کو خام تیل فراہم کرنا دراصل معیشت کی معاونت اور شامی عوام کی مدد کا تسلسل ہے۔

شام کے وزیرِ توانائی محمد البشیر نے "العربیہ" کو بتایا کہ سعودی عرب کی جانب سے دیا گیا خام تیل بانیاس ریفائنری کو بھیجا جائے گا، جس سے شام کی معیشت کو سہارا ملے گا۔ انھوں نے مزید کہا "ہم سعودی عرب کے شکر گزار ہیں کہ اس نے ایک 16.5 لاکھ بیرل خام تیل فراہم کیا۔"

العربیہ کے نمائندے کے مطابق یہ تیل بانیاس ریفائنری میں مختلف مقاصد کے لیے استعمال ہو گا، جن میں گاڑیوں کے لیے ایندھن کی فراہمی اور ریفائنری کے تسلسل کو یقینی بنانا شامل ہے۔

واضح رہے کہ گزشتہ اگست میں سعودی عرب نے دمشق انٹرنیشنل فیئر کے موقع پر شام کی وزارتِ توانائی اور مختلف سعودی کمپنیوں کے ساتھ توانائی کے شعبے میں ایک معاہدہ اور چھ یادداشتیں دستخط کی تھیں۔

ان معاہدوں میں توانائی کے مختلف منصوبے شامل ہیں جن میں سعودی کمپنی "ایکوا پاور" کا شام کے ساتھ تعاون بھی شامل ہے۔ کمپنی نے شمسی توانائی اور بیٹری اسٹوریج کے منصوبوں کے لیے ایک ہزار میگاواٹ تک اور ہوائی توانائی کے منصوبوں کے لیے 1500 میگاواٹ تک بجلی پیدا کرنے کی تیاری کے لیے مطالعاتی معاہدہ کیا ہے۔